Үгэс буолбут Саха Өрөспүүбүлүкэтин судаарыстыбаннай былааһын ситэриилээх уорганын ааспыт сыллааҕы үлэтин отчуота бары улуустар нэһилиэктэригэр бара турар. Маннык отчуоттар бастакы президент Михаил Николаев көҕүлээһининэн республикаҕа 1998 сылтан ыытыллаллар. Муҥурдаах нэһилиэгэр олунньу 3 күнүгэр буолла.
Бөлөх салайааччыта Владимир Черноградскай бырабыыталыстыба сыллааҕы үлэтин отчуотун экраҥҥа көстөр презентация ситэрэн биэрдэ. Ол кэннэ олохтоохтор тустаах боппуруостарын биэрэн, хоруйдары ыллылар.
Мунньах уратытынан ОДьКХ, тутуу, мелиорация, социальнай, тыа хаһаайыстыбата, доруобуйа харыстабыта, үөрэх, эдэр ыччат хайысхаларынан кэлбит салайааччылар хас биирдиилэрэ тыл этэн, дьон санаатын истэн кэпсэтиини ыыттылар. Ордук тыа хаһаайыстыбатын миниистирин солбуйааччы Николай Афанасьевы кытта кэпсэтии көхтөөхтүк барда.
Мунньах кэнниттэн биирдиилээн олохтоохтору кытта тус көрсүһүү ыытылынна. Нэһилиэнньэни ордук оскуола тутуута, быраас үлэтин боппуруоһа, интернет, авиабилет сыаната, өртөөһүн, тыа хаһаайыстыбатын үлэтин туруга долгутар.
Оскуола директора Мария Ефимова оскуола тутуутун, проектнай смета докумуонун оҥотторууга көмө баар буолуон сөп дуо диэн, бочуоттаах сынньалаҥҥа олорор Акулина Никулина доруобуйа харыстабылыгар сыһыаннаах боппуруостары биэрэн тустаах тэрилтэ салайааччыларыттан эппиэт ыллылар. Акулина Никулина бүтэһик кэлэ сылдьыбыт мобильнай быраастар болҕомтолоох сыһыаннарын, үчүгэйдик үлэлээбиттэрин иһин махтанна, земскэй быраас уонна диспансеризация түмүгүн нэһилиэнньэҕэ бириэмэтигэр сөптөөхтүк тиэрдиигэ этиилэрин тириэртэ.
Министр Петр Шамаев ыччаты тыа сиригэр олохсутуу проблематыгар тохтуу сырытта. Бэйэтин санаатын тиэртэ. “Хоп” курдук саҥалаах-иҥэлээх эдэр миниистир кэпсэтиитэ дьон болҕомтотун тарта.
Екатерина Дохунаева, пенсионерка, транспорт боппуруоһугар тохтоото. Айан сыаната ыараан, нэһилиэнньэ бары араҥата саамай кыһалҕалаах боппуруоһа буолла диэтэ.
ОДьКХ филиалын маастара Николай Новиков саамай тыын боппуруоһу таарыйда. Ол курдук, чох таһыыта биһиги нэһилиэккэ ситэри тиэйиллиэ суох куттала баарын бэлиэтээтэ уонна ону хонтуруолга ылалларыгар көрдөстө. 2100 т. кэлиэхтээҕиттэн сибилиҥҥи туругунан 400 тн. эрэ тиэйиллибит. Онтон суол быстара 1,5 эрэ ый кэриҥэ хаалла. Чох тиэйиитэ кыайтарбатаҕына, аны кыһыҥҥы оттук сезона ыарахаттардаах буолар.
Константин Старостин өртөөһүн боппуруоһун, сылгыны аҕалыы, иитии боппуруостарыгар, быйылгы дьыл ыарахаттарыгар тохтоото.
Уопуттаах салайааччы Николай Степанович күннээҕиннэн олорууну тохтотон, проблеманы төрдүттэн быһаарсан, олохтоохтук оҥостон олорорго, инникилээх хайысхалары таба тайанан, ону кэҥэтэн үлэлиэххэ диэн ыҥырда. Тэрээһин баар эрэ сиригэр сөптөөх көмө барыахтааҕын, ханнык баҕарар үлэ нэһилиэк иһиттэн, аллараттан тахсыахтааҕын, сибилиҥҥи кыстык туруга ыараханын, соҕотох киһи кыайбатын, уопсай эрэ сүбэнэн кыайыахха сөбүн, онно тэрээһин эрэ баар буоллаҕына кыалларын чопчулаата. Оччоҕо эрэ кэпсэтии тахсыахтааҕын, көмө баар буолуо диэн эттэ. Үүт тутуутугар, субсидия, өртөөһүн тула сөптөөх кэпсэтии, сүбэ барда.
Маны таһынан тутуу боппуруоһун, мелиорация үлэтин, интернет киириитин туһунан кэпсэтии барда. Интернети өссө да 2 сыл кэтэһэр буоллубут.
Мунньах бүтүүтэ үөһээҥҥи тэрилтэлэриттэн, үөрэҕирии министиэристибэтиттэн оҕо уһуйаанын үлэһитэ Вера Слепцова, Арктика уонна хотугу норуоттар министиэристибэлэриттэн – Петр Новиков, доруобуйа харыстабылын министиэристибэтиттэн быраас Галина Федорова махтал суруктары туттулар.
2 чаастан ордук барбыт кэпсэтии түмүгүнэн инники хардыылар бааллар, олору чиҥэтэн иһиэҕиҥ диэн мунньах салайааччыта түмүктээтэ.
Анастасия СОРОКОУМОВА, Сыаҥааннаах.