Сцена. Прожектор. 80-с сыллардааҕы эдэр киһи хоһо. Истиэнэҕэ -Шатунов хаартыскалара, гитара, остуолга — кассеталар, магнитофон, Ильич лаампалаах светильник, будильник. Экран. Киин телевидениеҕа аан бастакынан көстүбүт Шатунов клибэ, хит буолбут “Белые розы” ырыа. Оччотооҕу таҥастаах, бөрүчүөскэлээх, сэбиэскэй магнитофоннаах дьон үҥкүүлүү-үҥкүүлүү киирэн кэллилэр, ыалдьыттары үҥкүүгэ ыҥырдылар…
Ити курдук балаҕан ыйын 16 күнүгэр көмүс күһүн бүтэһик сылааһынан угуттуур күндү күннэрин баттаһа, сүрэхтэргэ самаан сайыммытын эргитэ, оҕо, эдэр сааспыт тапталлаах ырыаһытын Юрий Шатунов сырдык кэриэһигэр аналлаах «В осенний день немного лета…» ахтылҕан киэһэнэн Муҥурдаах нэһилиэгин А.А.Дохунаева аатынан Төрүт култуура киинэ сезонун арыйда.
Ырыаһыт, музыкант, поэт, композитор мөлүйүөнүнэн дьон кутун туппут тапталлаах кумирбыт Юрий Шатунов былырыын бэс ыйын 23 күнүгэр олохтон соһуччу туораабыта… Кини баара буоллар, бу күннэргэ балаҕан ыйын 6 күнүгэр 50 сааһын эрэ туолуохтаах этэ…
1980-с сыллар бүтүүлэригэр ССРС ыһыллаары турдаҕына, Юрий Шатунов ураты куолаһа, Сергей Кузнецов айбыт ырыалара, “Ласковый май” детдом оҕолорун бөлөҕө норуот кутун туппуттара. Бөлөх солиһа Шатунов судургу тыллаах эрээри, таптал, доҕордоһуу, таҥнарыы туһунан истиҥ ырыалара эдэр ыччат сүрэҕин тута абылаабыттара, билигин да абылыы тураллар.
Бу ахтылҕан киэһэтигэр тэрийээччилэр Юрий Шатунов туһунан оҥорбут презентацияларын туһанан, кини олоҕун, айар үлэтин сиһилии кэпсээтилэр. Ол кэннэ көрөөччүлэр ырыаһыт олоҕун төһө үчүгэйдик билэллэрин тургутан көрдүлэр. Манна кимнээҕэр да ырыаһыт олоҕун ымпыгар-чымпыгар тиийэ билэрин Анастасия Жиркова көрдөрдө, барыларын сөхтөрдө.
Салгыы ырыалары таайдылар. Бу түһүмэххэ истээччилэр арыый ыарырҕаттылар. Синтезаторга тыаһыыр аҕыйах нотанан ырыаны таайар уустук соҕус буолан биэрдэ.
Ону таһынан ыалдьыттар караокенан ыллаатылар, урукку кэнсиэрдэри, кэлиҥҥи видеоклиптэри көрдүлэр, дуоһуйуохтарыгар диэри үҥкүүлээтилэр.
Сылдьыбыт дьон оччотооҕу кэмнэрин наһаа истиҥник ахтан-санаан аастылар. Ол курдук, Василий Жирков: “Шатунову аан бастаан Кавказка армияҕа сылдьан истибитим. Наһаа сөбүлүүбүн. Оттон убайым сөбүлээбэт. Шатунов ырыалара киһи санаатын наһаа көтөҕөллөр. Сайын ходуһаҕа от оттуу сылдьан истэбин. Наһаа үчүгэй”, — диэн санаатын үллэһиннэ.
Николай Стручков: “Мин оскуоланы, хойутаан, 1973 сыллааҕы оҕолору кытта бүтэрбитим. Шатунов баара буоллар, кылааһынньыктарым курдук, 50 саастаах буолуохтаах этэ. Биһиги кылаас оҕолоро Шатунов ырыаларын наһаа сөбүлүүр этибит. Биир кыыспыт ити “Белые розы” клипкэ үҥкүүлүүр кыыс курдук таҥнан-симэнэн, баттаҕын оҥостон сылдьааччы. Дискотека кэмигэр кини ырыаларын истэн хараҕын уутун тоҕоро. Бары даҕаны кини ырыатын көтүппэккэ үҥкүүлүүрбүт”.
Светлана Андросова: “Биһиги оччолорго кыра оҕолор этибит. Дискотекаҕа кэллэхпитинэ, улахан кылаастар үүрэн ыыталлара. Онно дискотекаҕа Шатунов ырыалара тыаһыыллара”.
Маргарита Левина: “Биһиги саҕана “Мираж” бөлөх этэ. Онтон Шатунов биллибитэ, онно мин Дьокуускайга студенныы сылдьарым. Куорат киоскаларыгар, автобус иһигэр наар кини ырыалара тыаһыыр этилэр”.
Гаврилл Атласов: “Ол саҕана биһиги кылааспыт уолаттара Ефим Ребров, Михаил Слепцов Шатунов хаартыскаларын атыылыыллар этэ. Биһиги почтанан сурук суруйан ыытааччыбыт. Онтон Шатунов кассеталара тигинээн кэлэллэр этэ. Хас да кассета билигин да баар. Оччолорго кассеталары хат уһултара-уһултара атыылаабыт киһи элбэх харчыны “тыаһатыа” эбит. Кэлин сакаастаабыт диискэбин уордаран кэбиспитим.
Поклоницаларыттан элбэх кыыс бэйэтигэр тиийиммитэ. Ол үксэ баай ыаллар атаах оҕолоро этэ дииллэр. Разинныын уһуннук сууттастылар. Шатунов куолаһа, ырыаларын музыката, ис хоһооно — барыта табыллыбыт буолан, буомба эстибитин курдук буолбута, киһи барыта наһаа сөбүлээбитэ. Мин кини ырыаларын билигин да наар истэбин. “Все”, “Тающий снег”, “Грезы”, “Без тебя” уо.д.а.”.
Бүтэһиккэ тэрийээччилэр кэлбит ыалдьыттарга өйдөбүнньүк буоллун диэн бэйэлэрэ оҥорбут кыра сэмэй бэлэхтэрин – “магниткалары” туттардылар. Бу тэрээһиҥҥэ кэлэргэ 80-90-с сс. истииллээх таҥас кэтэн, дресс-кодтаныахха сөп дэниллибитэ. Онон “Чараҥ” ансаамбыл кыргыттара “Розовый вечер” ырыа тылларыгар дьүөрэлээн, оруосабай таҥас кэтэн киэһэни киэргэттилэр.
Ырыаһыт сырдык кэриэһигэр анаммыт ахтылҕан киэһэҕэ ыалдьыттар элбэҕи билэн, оонньоон-көрүлээн, ыллаан-туойан, үҥкүүлээн-битийэн, эдэр саас эрчимнээх кэмнэригэр “умсан”, тэрээһин аата да этэрин курдук, күһүҥҥү курус күннэрин биллэ сэргэхситтилэр.
Юрий Шатунов төһө да Арассыыйа норуотун ырыаһыта диэн ааты ылбатаҕын иһин, кинини норуот билинэр, өйдүүр-саныыр, үйэтитэр.