Бу саас өрөспүүбүлүкэ киин улуустарыгар сүөһү пастереллёзунан ыалдьыбыт түгэннэрэ бэлиэтэммитэ. Онуоха Тыа хаһаайыстыбатын уонна судаарыстыбаннай ветеринарнай сулууспа ылынар суһал дьаһалларын түмүгэр, ыарыы киэҥник тарҕаммата. Бу туһунан миниистир Артем Александров «Саха» көрдөрөр-иһитиннэрэр хампаанньа ханаалыгар аһаҕас эпииргэ иһитиннэрбитэ. Билигин сүөһүнү уонна дьиэ кыылларын араас ыарыыттан харыстыыр сэрэтэр үлэлэр ыытыллаллар.
Биһиги улууска эмиэ тустаах үлэ улуустааҕы тыа хаһаайыстыбатын управлениетын уонна ветеринарнай сулууспа нөҥүө оҥоһуллар. СӨ Уус-Алданнааҕы ветеринарнай пуунун Абыйдааҕы филиалын салайааччыта Екатерина Чиркова иһитиннэрэринэн, улууска ветеринарнай үлэлэр тиһиктээхтик ыытыллаллар.
Ветеринардар сүрүн үлэлэрэ саас уонна күһүн буолар. Билигин улууска сылгыны чиптээһин ыытылла турар. Бу кварталга 449 төбө сылгыттан, ону тэҥэ 224 төбө ынахтан хаан ылыллыахтаах.
Маны сэргэ бруцеллёз, туберкулёз уонна да атын ыарыылары сэрэтэр быһыы (вакцинация) үлэтэ барар. Дьиэ кыылларыгар — ыттарга уонна куоскаларга — эмиэ сэрэтэр быһыыны туруораллар уонна кинилэр хойууларын чинчийэллэр. Маннык үлэ табаларга эмиэ ыытыллар.
«Билигин улууска санитарнай-эпидемиологическай турук этэҥҥэ. Вакцинация үлэтэ бэс ыйыгар диэри салҕаныаҕа», — диэн бэлиэтиир Екатерина Михайловна.
Түгэнинэн туһанан, хаһаайыстыбалаах уонна дьиэ кыыллаах дьону кыыллары көрүүгэ-харайыыга эппиэтинэстээх буоларга, кэмигэр наадалаах быһыыны туруортарарга ыҥырар.
Лариса СЛЕПЦОВА.