Араас талааннаах, араас идэлээх Ийэлэр элбэхтэр. Оттон сылгыһыт ийэ, арааһа, ахсааннаах буолуо. Абый нэһилиэгэр олорор Елизавета Слепцова – үлэһит бастыҥа дьахтар. Сатаабата диэн суох. Эр дьону тэҥинэн сылгы ииттэр, сайын үтүөтүн оттоон аһарар.
Аймах ууһунан үлэһит дьон
Иван Прокопьевич уонна Акулина Дмитрьевна Слепцовтар дьиэ кэргэттэригэр 7-с бүтэһик оҕонон, 1976 с. Бөтүрүөп сөрүүнүгэр күн сирин көрбүтэ.
4 уол кэнниттэн төрөөбүт буолан, мурун бүөлэрэ олус атаах этэ. Убайдарын батыһа сылдьан улааппыта. Кинилэргэ дьуһуурустубаннан сүктэриллэ сылдьан сэриилэспит киһи кини баар. Ол да таайдаҕа буолуо, билигин эр киһиттэн итэҕэһэ суох үлэни толорор, сырыыны сылдьар.
Ийэлэрэ Акулина Дмитрьевна билигин да сиэннэрин, хос сиэннэрин кытта хотоҥҥо сылдьыһар, сүөһүттэн илиитин араара илик. Ол да иһин буолуо, аймах ууһунан үлэһит дьон. Уйбааскылара тыа хаһаайыстыбатынан дьарыктанара улууска, республикаҕа биллэр.
Лиза эрдэ, 32 сааһыгар, огдообо хаалан, дьиэтин-уотун, оҕолорун соҕотоҕун атахтарыгар туруорда. Быйыл пенсияҕа таҕыста. 3 оҕолоох. Улахан кыыс Ангелина учуутал идэлээх, оскуолаҕа баһаатай, кэтэхтэн СВФУ-га психолог идэтигэр үөрэнэр. Орто уол Ваня армия кэнниттэн тутууга, үөрэнэн ылбыт идэтинэн — сварщигынан үлэлиир. Кыра уол Дьулус 11 кылаас үөрэнээччитэ.
Иистэнньэҥ, асчыт уонна оҕуруотчут
Елизавета Ивановна дьахтар сатыахтааҕын барытын сатыыр. Идэтинэн иистэнньэҥ уонна оҕуруотчут. Покровскай Өктөмүгэр үөрэммитэ. Билигин үҥкүү таҥаһын быһар, тигэр. Дьахталлар бэйэлэрэ көрдөһөн, сакаастаһан сахалыы таҥас тиктэрэллэр. Онно иис иһигэр олорор.
Сайын отуттан ордон оҕуруотунан дьарыктанар. Теплицэлээх, сибэккитэ-оҕуруота дэлэй. Хортуосканы кыайа тутар. Сайыны быһа хас да ыалы аһатар оҕуруотчут.
Оскуолаҕа поварынан өр сылларга үлэлээн кэллэ. Көрдөөх-нардаах, кэпсээнньит киһи коллективыгар сөбүлэтэр. Астаабыт аһын оҕолор да, улахаттар да минньигиһиргэтэн сииллэр.
Сылгыһыт ийэ
Елизавета кэргэнэ “барыаҕыттан” сылгыларын бэйэтэ көрөр. Уопсайа 4 төбө баар. 1 үөртэн билигин оччо хаалла. Дьахтар киһиэхэ ыарахан үлэ. Дьиэтин таһыгар сылгыларыгар даллаах. Бастаан ахсынньыга тутан аһатар. Тохсунньуттан иккистээн киллэрэн, аһата түһэн таһаарар. Үчүгэй дьылга төрүүллэрин саҕана үһүстээн кулун тутарга киллэрэр. Оттон, холобур, былырыын, куһаҕан дьылга, ынах курдук, кыһыны быһа күрүөттэн аһаппыттара.
Хоспохтоох диэн сиргэ сайын аайы оҕолорун кытта оттуур. Техниканы барытын уолаттара ыыталлар. 2021 с. “Синтай” трактор ылыммыттара. Аны онон кэбиһэр буолан абыраннылар. 2023 с. соцконтрагынан субсидия ылан, техникатыгар саппаас чаастарын булуммута. Таайдара Мишук кэргэнин кытта көмөлөһөр.
Уолаттарын кыра эрдэхтэриттэн техникаҕа сыстаҕас гына үөрэппитэ. Күтүөтэ Володя Петров онуоха улахан өҥөлөөх. Уолаттары кыра эрдэхтэриттэн батыһыннара сылдьара. Ванюшка 6 сааһыттан водовозкаҕа, мотуорга, бурааҥҥа, беларуска барытыгар олорсо сылдьан, ыыта үөрэммитэ. Кып-кыра эрдэҕиттэн оскуолатыттан үргүлдьү Талахтаахха баран кэлэрэ.
Оҕолор ынахха, сылгыга кыра эрдэхтэриттэн сыстаҕас буоланнар, хара үлэни көрөн турбаттар. Улаатаннар, дьиэттэн тэйэннэр, Елизавета ынах сүөһүтүн былырыын эспитэ. Ол да буоллар кыра уол Дьулус – сүөһү көрүүтүн волонтера. Дьээдьэтигэр Анатолий Стручковка көмөлөһөр. «Удьуордарын баппыт оҕо ити баар», – диэн аймахтар астыналлар.
Ити курдук, Елизавета Ивановна саха дьахтарын сиэринэн, сырдыгы хараҥаны силбээн сылдьар туруу үлэһит. Нэһилиэк, коллектив общественнай олоҕуттан туора турбат. Кинини кэлэн иһэр Ийэлэр күннэринэн итиитик-истиҥник эҕэрдэлиибит, чэгиэн туругу, дьолу баҕарабыт.
Анастасия СОРОКОУМОВА, Сыаҥааннаах.