Президент экология боппуруоһугар улахан болҕомтотун уурда

Анатолий Софронов, Абый улууһун айылҕа харыстабылын комитетын салайааччыта: 

Арассыыйа Бэрэсидьиэнэ Владимир Путин Федеральнай Мунньахха Туһаайан этиитигэр Арассыыйа алта сыллаах сайдыытын Бырагырааматын иһиттибит.

2030 сылга диэри экология тыын суолталаах боппуруостарыгар ыытылар үлэ стратегиятын иһитиннэрдэ. «Ыраас уу» национальнай бырайыагынан үлэ салгыы ыытыллыаҕа, нэһилиэнньэни үчүгэй хаачыстыбалаах иһэр уунан хааччыйар дьаһаллар ылыллыахтара. Көҥүлэ суох сыбаалкалар, тобоҕу-ибэҕи мунньар полигоннар, тулалыыр эйгэҕэ, киһи-сүөһү доруобуйатыгар кутталы үөскэтэр эбийиэктэр суох оҥоһуллуохтара. Тобоҕу суортаан, иккистээн туһаҕа таһаарыы технологията киллэриллиэҕэ.

Владимир Путин маһы көҥүлэ суох кэрдиини утары охсуһууну күүһүрдэр, тыаны чөлүгэр түһэрии үлэтин салгыыр туһунан эмиэ эттэ. «2021 сылтан саҕалаан Арассыыйаҕа кэрдиллибиттээҕэр быдан элбэх мас олордуллар», — диэтэ! Ойуур хаһаайыстыбатын үлэһиттэрин, метеорологтар уонна экологтар хамнастарын үрдэтэргэ эттэ. Биэс-алта сыл иһигэр экологияҕа уонна айылҕа харыстабылыгар сыһыаннаах бырайыактары олоххо киллэриигэ тирэх буолар пуонда тэриллиэҕэ, ураты харыстанар сирдэргэ экологическай туризм сайдыаҕа, онуоха аныгы ирдэбилгэ сөп түбэһэр инфраструктура оҥоһуллуоҕа.

Читайте дальше