Бары билэрбит курдук, үүммүт 2024 сыл дойду үрдүнэн Дьиэ кэргэн сылынан биллэриллибитэ. Бүгүн эһиэхэ Абый нэһилиэгин элбэх оҕолоох эдэр ыалын – Стручковтары билиһиннэрэбин.
Диана уонна Алексей сүрэхтэринэн сөбүлэһэн, 2013 сыллаахха алаһа дьиэ тэриммиттэрэ. Дьиэ хаһаайына Алексей элбэх оҕолоох ийэ Бережнова Акулина Николаевнаҕа төрдүс оҕонон күн сирин көрбүтэ. Ыал ийэтэ Диана ыаллыы сытар Ураһалаах нэһилиэгиттэн төрүт ыал Ия Ивановна, Владимир Васильевич улахан кыыстара.
Алексей улууска биллэр дуобатчыт. Улуустааҕы дуобат күрэхтэһиитин хас да төгүллээх чемпиона, призера. Волейболга нэһилиэк сүүмэрдэммит хамаандатын чилиэнэ. Диана оҕо эрдэҕиттэн волейболга оонньуурун сөбүлүүр, нэһилиэк, улуус иһинэн ыытыллар күрэхтэргэ өрүү кыттар. Эдэр ыал оҕолорун кыра эрдэхтэриттэн успуорка угуйаллар, бэйэлэрэ сатыылларыгар үөрэтэллэр, эрчийэллэр.
Улахан уоллара Вова 5-с кылааска таҕыста. Туйгун үөрэнээччи. Элбэх олимпиадаларга кыттар, кыайар. Вова, өссө уһуйааҥҥа сылдьан дуобакка улууска бастаан, мэтээлинэн, кубогынан наҕараадаламмыта. Онтон ыла дуобат күрэҕэр тиһигин быспакка кыттар, ситиһии кынаттанан, дьонун үөрдэр. Аҕатын кытта иллэҥ кэмнэригэр куруук дьарыктаналлар. Маны таһынан Вова биир сөбүлүүр дьарыга – көҥүл тустуу, хапсаҕай. 2023 с. Василий Стручков-Абый Бааска бирииһигэр тустууга I миэстэ, хапсаҕайга абсолютнайга чемпион үрдүк аатын ылбыта. Салгыы бырааттыы Хабаровтар ааттарынан көҥүл тустууга I миэстэ, Кэбэргэнэҕэ ыытыллыбыт Никулин аатынан күрэххэ эмиэ I миэстэ буолбута. Оҕо ситиһиитэ – дьиэ кэргэн үөрүүтэ, киэн туттуута буоллаҕа. Түгэнинэн туһанан, төрөппүттэр учууталларыгар, тренергэ Сергей Черемкиҥҥа махталларын тиэрдэллэр. Бу ситиһиилэринэн Вова улууска «Лучший спортсмен» аатын ылбыта уонна бу күннэргэ Краснодарскай кыраайга лааҕырга бараары үөрэ-көтө сылдьар. Спорт көрүҥнэриттэн ордук футболу, көҥүл тустууну, дуобаты сөбүлүүр, билигин волейбол оонньуурга үөрэнэр.
Ыал соҕотох кыыһа Лилиана 4-с кылаас үөрэнээччитэ. Кини эмиэ убайын кытта тэҥҥэ дуобаттыыр. Мурун бүөтэ кыра уол Харысхан уһуйаан иитиллээччитэ.
Ити курдук, эдэр ыал Алексей, Диана Стручковтар оҕолорун успуорт араас көрүҥнэригэр, чөл, чэгиэн олоххо угуйаллар.
Билигин Алексей Николаевич ОДьКХ тутаах үлэһитэ, Диана Владимировна дьиэ хаһаайката. Диана аныгы ийэ быһыытынан оҕо, дьиэ көрүүтүнэн эрэ муҥурдаммат, кыралаан атыынан дьарыктанар. Аатырбыт, доруобуйаҕа буортута суох «Таппер» иһиттэрин сакаастаан ылан, элбэх хаһаайканы үөрдэр.
Дьиэ кэргэн сынньалаҥы бары бииргэ атааралларын, успуорт, интеллектуальнай күрэхтэргэ кытталларын сөбүлүүллэр.
Билигин элбэх оҕолоох эдэр ыалга судаарыстыба элбэх көмөнү оҥорор. Ону туһанан, ыал дьиэ туттар, атыылаһар, бэйэ дьыалатын сайыннарар. Онон Дьиэ кэргэн, Оҕо саас сылларыгар хас биирдии дьиэ кэргэн судаарыстыба өйөбүлүн туһанан, олоҕун уйгутун оҥосторугар баҕарабыт.
Анна ЧИРКОВА. Абый с.