Россия тэбэр сүрэҕэр Москва куоракка ыытыллыбыт «Таланты России», Санкт-Петербург куоракка «Таланты Северной столицы» уонна «Танцевальный калейдоскоп» норуоттар икки ардыларынааҕы күрэхтэргэ Саха сириттэн 62 кыттааччы ситиһиилээхтик кытынна.
Санкт-Петербург куоракка «Таланты Северной столицы» күрэххэ Абый улууһун Ураһалаах нэһилиэгиттэн Сахаяна Потапова, «Сандаар» оҕо ансаамбыла (сал. Альбина Соломова) уонна Таатта улууһун Чычымах нэһилиэгиттэн «Алаас» фольклорнай ансаамыл (сал. Егор Макаров) Гран-при үрдүк аатын сүктүлэр.
Ураһалаах оскуолатын үөрэнээччитэ Ваня Стручков (сал. Галина Белоус), Белай Гора бөһүөлэгин оҕо музыкальнай оскуолатытын үҥкүү бөлөҕө (сал. Арина Рязанская), уонна Аллараа Халыматтан «Йон’чэпэдиэ» (салайааччы Маргарита Вырдылина) I истиэпэннээх лауреат, Абый нэһилиэгиттэн «Абый кэскилэ» (сал. Варвара Черемкина, Парасковья Никулина), Майыар национальнай нэһилиэгин оскуолатын үөрэнээччитэ Кирилл Андреев II истиэпэннээх лауреат буоллулар.
«Илии тутуурдаах, өттүк харалаах» Сахабыт сиригэр кэллибит. Казань, Сочи куораттарыгар уонна кремлевскай елкаҕа ыҥырыы туттубут. Хоту сиртэн Москва, Санкт-Петербург курдук ыраах куораттарга ыллыҥ да барбаккын. Бу барыыбытыгар Арктика министерствота (министр Владимир Черноградскай) бырайыас өттүнэн улахан өйөбүл оҥорбутугар, Саха сирин представительыгар Лариса Макароваҕа портан көрсүүттэн саҕалаан барытын былааннаан тэрийэригэр, оскуолабыт директорыгар Изольда Стручковаҕа, завучпутугар Акулина Дохунаеваҕа, коллективка, оҕо сайдыытын өйүүр төрөппүттэрбитигэр, Ваня Стручков салайааччытыгар Галина Белоуска уонна Абый улууһун олохтоохторугар үтүө тылларын, куйаар ситим нөҥүө өйөбүллэрин иһин махтанабын», — диэн Ураһалаах оскуолатын музыкаҕа учуутала, «Сандаар» оҕо ансаамбылын салайааччыта Альбина Соломова тириэрдэр.
Ураһалаах оскуолатын директора Изольда Стручкова: «Оҕолорбут Россия киин куораттарын Москва, Санкт-Петербург үрдүк сыаналарыгар чаҕылхай сыанабыл ылбыттара олус үөрүүлээх, долгутуулаах. «Сандаар» ансаамбыл салайааччытыгар Альбина Романовнаҕа, Ваняны ырыатын бэлэмнээбит, уһуйбут салайааччыга Галина Афанасьевнаҕа истиҥ эҕэрдэ уонна махтал.
Төрөппүттэргэ махтал. Оҕолоргут киһи киһитэ, киһилээх киһи, киһилии киһи буолан үүнэн-сайдан истиннэр, ситиһиилээх дьон буола улааттынар. Эдэр учууталбытыгар Сахаяна Сергеевнаҕа эҕэрдэ бастыҥа. Ис айылҕаҕын ити курдук куруук илдьэ сылдьан сайыннара тур, уһуйуллааччылардаах буол».
Александра ЗАРОВНЯЕВА.