Майыар. Бу сайын олохтоох көҕүлээһини өйүүр бырагырааманан сайыҥҥы уу ситимэ тардыллыахтаах. Бу күннэргэ үлэ күүскэ барар.
Ыытыллар үлэ уопсай суумата — 1 мөл. 100 тыһ. солк. Республикаттан 800 тыһ. солк. субсидия көрүллүбүт, олохтоох бюджеттан — 200 тыһ., нэһилиэнньэ 100 тыһ.солк. хомуйбут.
«Матырыйаала кыһыҥҥы суолунан аҕалыллыбыта. Үлэни Николай Бурцев салалтатынан олохтоох биригээдэ толорор. Билигин емкостары туруордулар. Уу ситиминэн нэһилиэк барыта хабыллыа – бу 145 ыал», — диэн олохтоох дьаһалта исписэлииһэ иһитиннэрдэ.
Быйыл сайын нэһилиэнньэ толору уунан хааччыллан, хаһаайыстыба үлэтигэр туттарыгар, оҕуруотугар, сибэккилэргэ уу кутарыгар кыһалҕата быһаарыллыа.
***
Тыа хаһаайыстыбатын хайысхатын туһунан эттэххэ, от үлэтигэр устудьуоннары, улахан кылаас оҕолорун түмэн биригээдэ тэрийэн үлэлэтэргэ былаанныыллар.
***
Улуус 95 сылыгар ананар үбүлүөйдээх ыһыахха бэлэмнэнии саҕаламмыт. Комиссия мунньаҕар нэһилиэк ыһыаҕын кэмигэр ыытыллар күрэхтэр балаһыанньаларын быһаарбыттар. Түөлбэлэр, биир дойдулаахтара көхтөөх кыттыыны ылыахтара диэн эрэнэллэр.
***
Оскуола иһинэн тэрээһиннээх оҕо сайыҥҥы сынньалаҥа тэриллэр. Алын кылаас 15 үөрэнээччилэрэ «Төлөн» күнүскү чэбдигирдэр лааҕырга сынньаналлар. Салайааччынан музыка учуутала Альбина Соломова үлэлиир. Оттон «Дьоҕур» үлэ-сынньалаҥ лааҕыра бастакы сезоҥҥа 10 оҕону хабар. Мария Стручкова салайан үлэлэтэр. Сезон устата оҕолор оскуола теплицатын, оҕуруотун көрүөхтэрэ-истиэхтэрэ, Кыайыы болуоссатын шефтэһэллэр, бөһүөлэк ыраас буоларыгар кыһаллаллар. Лааҕыр үөрүүлээх арыллыытыгар улуус иһинэн ыытыллыбыт күрэх бастыҥнарыгар грамота уонна кубок туттарбыттар. «Бастыҥ үөрэнээччи» ааты София Никулина, «Бастыҥ спортсмен» ааты Кирилл Андреев, Айчилаан Степанов туппуттар.
Ону таһынан оҕолор «Научное лето» онлайн-лааҕырга (Өлүөхүмэ) дьарыктанарга баҕаларын биллэрбиттэр. Төрөөбүт дойдуларын айылҕатын – отун-маһын, кыылларын, көтөрдөрүн үөрэтэр краеведческай хайысхалаах лааҕыр. «Нечэ» фольклор ансаамбыла (сал. Альбина Соломова) Казань куоракка фестивальга кыттар ыҥырыылаах.