Дьооску. Манна уот саҥа станцията тутуллубута иккис сылыгар барда. Дьокуускай куораттан «Анмар-2» чааһынай тэрилтэ тутууну ыытар.
«Бу күннэргэ емкоска акылаат туттулар, ыскылаат туруордулар. Бетон кутуута саҕаланыаҕа. Үлэ-хамнас күөстүү оргуйар. Барыта былаан быһыытынан бардаҕына, күһүн саҥа станция Дьооскуга үлэҕэ киириэҕэ», — диэн маастар Сергей Чирков иһитиннэрэр.
Сыаҥааннаах. Нэһилиэк тыатын хаһаайыстыбатын исписэлииһэ иһитиннэрбитинэн, сүөһү төрүөҕүн үгэнэ. Ол курдук, нэһилиэккэ баар 53 төрүүр ынахтан 39 төрөөн турар. 25 төбө ИП Старостина Е.В. ынаҕа, 15-һэ төрөөтө. 5 субаҥҥа ыытылынна. 11 ынах ыанар. Үүт кыралаан атыыга тахсар.
126 биэ баарыттан 56 кулунчуктаммыт.
Хаһаайыстыбалар күһүҥҥүгэ 65 тонна от, 2,5 т. эбиэс, 3,2 т. комбикорм хаөаастаахтар.
(фото) Уолбут. Нэһилиэк аҕа баһылыга Эдуард Сергеев нэһилиэккэ ыытыллар сааскы үлэлэри билиһиннэрдэ: «Муус устар ыйтан ыам ыйын 15 күнүгэр дылы баһаартан сэрэхтээх буолуу ыйа биллэриллэн, 10 м. кэтиттээх, 3 биэрэстэ усталаах минерализованнай балаһаны ыраастыыр үлэ ыыттыбыт. Былырыыҥҥы улахан баһаар кэнниттэн көрдүгэн күөдьүйэрин кэтээн көрүү барар. Олохтоохтор көмөлөрүнэн икки сиргэ күөдьүйбүт уот умуорулунна
Нэһилиэк эр дьонун көмөтүнэн авиаплощадка эргэ мас күрүөтүн көтүрдүбүт. Ону туһаҕа таһааран, ааспыт сайын баһаарга эмсэҕэлээбит ходуһабыт күрүөтүн оҥордубут. Бу улахан үс күннээх субуотунньукка нэһилиэкпит эр дьоно күүскэ үлэлээтилэр. Кэрэ аҥаардарбыт ас астаан, күүс-көмө буоллулар, көхтөөх кыттыыны ыллылар.
2024 с. олохтоох нэһилиэнньэни көҕүлүүр бырагыраамманан авиаплощадка күрүөтэ аныгылыы ирдэбилгэ эппиэттиир гына тимир тулааһыннаах олбуорун оҥоруу үлэтэ саҕаланна. Үлэни урбаанньыт Попов Ю.Н. ыытар, киниэхэ ЖКХ үлэһиттэрэ Стручков О.О., Слепцов В.Е. көмөлөһөллөр.
Хаар ирэн, суол-иис куура быһыытыйда, бу күннэргэ үгэс курдук, бөһүөлэги хомуйуу, ыраастааһын саҕаланна.
Былааҥҥа 2025 с. олохтоох нэһилиэнньэни көҕүлүүр бырагыраамма чэрчитинэн оҕо оонньуур былаһааккатын саҥардыы үлэтэ турар. Үлэ окко киириэх иннинэ ыытыллыахтаах.
Бэлэмнээтилэр Анна Чиркова,
Анастасия Сорокоумова, Лариса Слепцова.