Абый. Нэһилиэккэ сыллата ыытыллар сайыҥҥы сезоҥҥа киирии улэлэрэ бара тураллар. Бу туһунан нэһилиэк баһылыга Тимофей Томскай иһитиннэрэр: «Ол курдук, сир үрдэ ирбитин кэннэ свалкабытын чөкөттүбүт, дьорооннору астардыбыт.
Оттуур, мэччирэҥ сирдэрбитигэр дулҕаны, талаҕы тракторынан астаран, сирбитин ыраастанныбыт. Сирдэрбитин көрбүтүнэн талахха, дулҕаҕа былдьатан эрэрбититтэн ыксааммыт. Урут бу кэмҥэ, ходуһа, мэччирэҥ сирин таһаарыыга, баһаартан сэрэҕи тэйитэр сыаллаах өрт үлэтэ барааччы. Хомойуох иһин, хаһаайыстыбаҕа, олоххо үтүө бу тэрээһин федеральнай сокуонунан бобуллан турар. Чугаһынан өрүһэ, үрэҕэ суох буолан, сайыҥҥы кэмҥэ саамай сүрүн көлөбүт – самолет көтөрүгэр сөп түбэһэр гына Абый, Дьооску портарын оҥоһуннубут. Кэнники уонча сыл кураан туран иһэр, хаһаайыстыбаҕа туһанар ууга нэһилиэнньэ кыһалҕатын быһаарарга элбэх үлэ барар. Бу боппуруос этэҥҥэ быһаарыллар. «Анмар-2» тэрилтэ үлэһиттэрэ Дьооскуга саҥа станция тутуутугар үлэлииллэр. Кэмигэр тумуктүүр былааннаахтар. Ыһыах күнүн көрсүүгэ бэлэмнэниилэр бара тураллар.
Бу ый бастакы аҥаара ардахтаах туран, от үүнүүтэ, былырыыҥҥыга холоотоххо, үчүгэй буолуох курдук. Онон, от ыйа, атырдьах ыйа санаа хоту турдахтарына, оппут былаанын толоруохпут, тиийэр гына оттонуохпут диэн эрэл баар. Быраас көрдөнөбүт. Уот этэн, үчүгэй быраас көстөрө буоллар диэн баҕа санаалаахпыт. Тыа дьонун түбүгэ төгүрүк сыл устата бүппэт элбэх».
Хаартыскаларга: Талаҕы ыраастааһын субуотунньугар