Алтынньы ый ортолосто. Бокуруоп күнүттэн кыстык күннэрэ ааҕыллыбытынан бараллар. Улууспут нэһилиэктэрэ кыстыкка бэлэмнэрин туһунан олохтоох баһылыктартан ыйыталастыбыт.
УОЛБУТ. Нэһилиэк баһылыга Марфа Хабарова:
— Быйылгы кыстыкка бары хаһаайыстыбалар этэҥҥэ кэмигэр киирдилэр. Ааспыт күһүн алтынньыга халыҥ хаар түһэн, ыарахан кыстык ааспыта. Онтон саас халаан уута кэлэн, кэккэ ыарахаттары үөскэтэ сырытта. Аны сайынын ардах быыстала суох түһэн, отчуттарга ыарахаттары үөскэппитэ. Аныгы үйэҕэ техниканан оттууллар. Ходуһа ууга сытар буолан, былаан аҥаара туолбата. Хата, күһүммут туран биэрэн, хаһаайыстыбалар хойукка диэри оттоотулар. Онон сүөһү кыстыгар ыарахаттардаах киирдибит. Билигин, халлаан улаханнык тымныйа илигинэ, былааннаах үлэлэри кэмигэр бүтэрэр сыал-сорук турар.
Киэҥ Күөлгэ быйылгы көрдөрүүнэн 6 киһи (хаһаайыстыба) ынах сүөһүнү тутан олорор. Уопсайа 31 сүөһү: ЛПХ – 21, КФХ – 10. Ол иһигэр ынаҕа 13, оҕус — 1 уонна ыччат сүөһүтэ 16 төбө. Сылгы ахсаана уопсайа 413: ЛПХ – 79, КФХ – 334. Ол иһигэр биэ ахсаана 239, атыыр — 27 уонна ыччат сүөһүтэ 144 төбө. Балаҕан ый бүтүүтүнээҕи туругунан 181,45 туонна от бэлэмнэммит. Билигин дьон үксэ рулонунан оҥороллор, кэбиһии от аҕыйаан турар. Бу кыһыны туоруурга тиийбэт. Ол иһин оройуонтан, УСХ тан 32 т. оту эбии көрдөөтүбүт. Көмөлөһүөхтэрэ диэн эрэнэбит. Билигин хаһаайыстыбалар хотоннорун, күрүөлэрин өрөмүөннээн, кыстыкка бэлэмнэнэллэр. Күһүҥҥү идэһэ ном нуо саҕаланна. Этин хаһаайыстыбалар бэйэлэригэр тутталлар уонна нэһилиэнньэҕэ атыылаан батараллар.
Нэһилиэнньэ хортуосканы хото үүннэрэр. Ол курдук, быйыл барыта 2 туонна 440 кг хортуоппуйу хомуйдулар. Ону таһынан хаппыыста, сүбүөкүлэ, моркуоп – барыта холбоон 1 т 400 кг хомулунна.
9 ыйдаах тыйыс усулуобуйалаах дойдуга олорорбутунан, хомунаалынай хаһаайыстыба үлэһиттэрэ ититии, уу ситимнэрин, хочуолунайдарын көрүнэн, өрөмүөннээн оҥоһуннулар. Оттук сезонугар бэлэмнэнии үлэни «ОДьКХ» ГУП улэһиттэрэ бэйэлэрэ ыыттылар. Быйыл ититии ситимнэрин салҕыы бүрүйдүлэр. Былырыын 60 м, быйыл 60 м. усталаах теплотрасса бүрүөһүнүн уларытан уонна оцинкованнай лииһинэн бүрүөһүнүн бөҕөргөтөн оҥордулар. Ону таһынан 50 кыраадыс тымныыны тулуйар насоснай оборудованиены уларыттылар, емкостарын суунан бэлэмнэннилэр. Улууска чох кэлиитэ ыарахаттары көрсөн, үөһэ салалта дьаһалынан, сылаас күннэргэ хочуолунайы оттууну хонтуруоллаан, балаҕан ыйыгар 10 т. чох экономияланна диэн Киэҥ-Күөл «ОДьКХ» ГУП маастара Стручков О. О. иһитиннэрэр.
Олохтоох дьаһалта уопсай дьиэлэр Речная 20/1, Речная 12 (кв. 3,4) кирилиэстэрин өрөмүөннэттэ. Суолу оҥоруу, биэрэги бөҕөргөтүү үлэтэ (Портовская, Речная уул.) барда.
Лариса СЛЕПЦОВА.