Абый орто оскуолатыгар Россияҕа Аҕа дойдуну, Саха сиригэр Ийэ дойдуну көмүскээччилэр сылларыгар уонна Улуу Кыайыы 80 сылыгар аналлаах патриотическай коммунардар түмсүүлэрэ үрдүк таһымҥа ыытыллынна.
Тэрийээччилэр — Прасковья Никулина, Владимир Дохунаев салалталаах оскуола активистара олус кыһаллан, күүстээх бэлэмнэнии үлэтин ыытан оҥордулар. Уопсайа 60-ча үөрэнээччи, учуутал кыттыыны ылла. Быйыл коммунарскай түмсүү уратытынан «ЮнАрмия» байыаннай-патриотическай хамсааһын чилиэннэрэ анал байыаннай формаларынан парадтаан киириилэрэ уонна республикатааҕы «Муусустар» бэстибээл тректарыгар майгыннатан ыытыллыбыта буолла.
Үөрүүлээх арыллыы үгэс курдук, дойду гимнин толорууттан, «Движение первых» уонна «ЮнАрмия» былаахтарын киллэрииттэн саҕаланна.
Эҕэрдэ тыллары Абый улууһун баһылыга Владимир Новиков, директоры иитэр-үөрэтэр үлэҕэ солбуйааччы Любовь Черемкина, тэрийээччи-педагог Владимир Дохунаев, улуустааҕы «ЮнАрмия» хамсааһын куратора Мария Черемкина эттилэр. Абый орто оскуолатын алын кылаас үөрэнээччилэрэ дириҥ ис хоһоонноох «Саха саллааттара» литературнай дьүһүйүүлэрэ, «Журавли» үҥкүүлэрэ мустубут ыалдьыттары долгутта. Салгыы үөрэнээччилэр Кыайыы скверигэр сибэкки дьөрбөтүн уурдулар, патриотическай «Победа-80» флешмобка кытыннылар.
«По следам росомахи» диэн байыаннай оонньуу олус тыҥааһыннаахтык ааста. Оонньууну Мария Черемкина иилээн-саҕалаан ыытта. Күрэх түмүгүнэн, I миэстэни Абый орто оскуолата, II миэстэни Уолбут орто оскуолата, III миэстэни Муҥурдаах орто оскуолата ыллылар.
Салгыы коммунарскай түмсүү эмблематын толкуйдаан, графическай дизайн күрэҕэр кыттыстылар. Маҥнайгы миэстэни Абый, иккиһи Муҥурдаах, үсүһү Майыар орто оскуолата ыллылар.
«Салют, Победа» диэн интеллектуальнай оонньууга Абый үөрэнээччилэрэ кыайыы өрөгөйүн биллилэр, Гимназия иккис, Муҥурдах үһүс буоллулар.
«Media-центр» трек ордук мөккүөрдээх, санаа этиниилээх күрэх буолла. Бу күрэххэ «Самый быстрый наборщик текста» уонна Кыайыы сылыгар аналлаах эрдэ бэлэмнэниллибит истиэнэ хаһыатын таһаарыы этэ. Түмүккэ Майыар орто оскуолата бастаата, иккис, үһүс миэстэни Абыйдар, Муҥурдаахтар ыллылар. Күрэҕи түмүктүүр «Песни военных лет» трекка бастакы миэстэни Муҥурдаах үөрэнэччилэрэ ылыахтарын ыллылар.
Бачча бэйэлээх улахан тэрээһин волонтердара суох табыллыбат. Күрэхтэһии түбүгэ, ас-үөл бэлэмэ, бөҕү-сыыһы хомуйуу кинилэр түбүктэрэ. Биир да чаас тохтообокко, этиттэрбэккэ VIII-IX кылаас үөрэнээччилэрэ үлэлээтилэр.
Доҕордоһуу, түмсүү, сайдыы бырааһынньыга олус бэһиэлэйдик, үрдүк тэрээһиннээхтик ыытыллынна. Оҕолорбут түүнү быһа оонньоон-көрүлээн, ыллаан-үҥкүүлээн бириэмэлэрин да билбэтилэр. Олохторугар биир умнуллубат түгэни бэлэхтээбит Абый орто оскуолатыгар бары үөрэнээччилэр, салайааччылар барҕа махталларын тиэрдэллэр.
Анна Чиркова.