Киэҥ Күөлгэ Саха Өрөспүүбүлүкэтин ийэлэрин күнүгэр аналлаах «Далбар Хотун-2026» куонкурус ураты сэргэхтик, өрө көтөҕүллүүлээхтик ааста. Күрэс талааннаах, сатабыллаах, муударай ыал ийэлэрин, дьиэ кэргэн холумтанын араҥаччылааччы айар-тутар кэрэ аҥаардары түмтэ, сомоҕолоото.
Араас идэлээх, элбэх оҕолоох, көхтөөх ийэлэр хас биирдиилэрэ бэйэлэрин ураты суолларынан, дьиэ кэргэннэрин ситиһиилэринэн уонна сахалыы мааны туттууларынан көрөөччү уонна дьүүллүүр сүбэ сүрэҕин абылыы туттулар.
Күрэс алта түһүмэхтээх ааста. Бэйэни билиһиннэриигэ («Уруйдан, Далбар Хотун!») күн күбэй ийэлэр тус бэйэлэрин, дьиэ кэргэннэрин, үлэлэрин-хамнастарын, дьарыктарын туһунан киһи эрэ сэргээн истиэх кэпсээтилэр. Ол барыта экраҥҥа көстө турбута куонкуруһу ситэрэн-хоторон биэрдэ.
Күрэх саамай чаҕылхай «Саха таҥаһа — үйэлээх кэрэбит» түһүмэҕэр кэрэ-мааны хотуттар сахалыы халадаайдарын, хаһыаччыктарын, бастыҥаларын, илин кэбиһэр киэргэллэрин кэтэн, ырыаҕа-тойукка уйдаран сценаҕа тахсыылара сүргэни көтөхтө, сааланы сэргэхситтэ.
«Өркөн өй – Далбар кистэлэҥэ» түһүмэххэ ийэлэр өбүгэ төрүт үгэстэрин, сиэри-туому, сахалыы аһы-үөлү төһө билэллэрин көрдөрдүлэр.
Дьэ, ол кэнниттэн «Минньигэс сандалы – Далбар аһа» түһүмэххэ хаһаайкалар астаан, киэргэтэн аҕалбыт бүлүүдэлэрин кэпсээтилэр. Түһүлгэҕэ, кырдьык да, ураты быйаҥ остуол тардылынна.
«Талаан күрэҕэр» күрэс кыттыылаахтара ыллаан, үҥкүүлээн, хомустаан, көрдөөх сценка көрдөрөн, көрөөччүлэри сөхтөрдүлэр.
Түмүктүүр «Мааны таҥас» түһүмэххэ ыал тапталлаах ийэлэрэ сиэдэрэйдик симэнэн, килбигийэ туттан киэһээҥҥи былааччыйанан таҕыстылар.
Долгутуулаах куонкурус түмүгүнэн барыларыгар анал ааттар иҥэрилиннилэр, сыаналаах бириистэр туттарылыннылар.
«КЫЛААН-ЧЫПЧААЛ» (Гран-При) үрдүк ааты уонна сүрүн бирииһи Уран Кыыһа Күннэй Таас ылла. Далбар Хотун-2026 буолла!
«Биһирэм Хотун» (Приз зрительских симпатий) — Уран Кыыһа Күннэй Таас;
«Сайдам Хотун» — Садовникова Ульяна Прокопьевна;
«Байылыат Хотун» — Слепцова Анна Ивановна;
«Талба Хотун» — Жиркова Аксинья Ильинична;
«Мааны Хотун» — Протопопова Евдокия Дмитриевна;
Аал уоппутун иччилиир, дьиэ кэргэммитигэр сылаас тапталы бэлэхтиир күндү Ийэлэрбитигэр өссө төгүл Уруй-Айхал буоллун!
Александра НОВГОРОДОВА, Киэҥ Күөл.