Эдэр саас. Киһи бэлэх курдук биирдэ бэриллэр эдэр-сэнэх кэмнэригэр олоҕун оҥостор, үһүгү ситиһэр, быһата — чыпчаал кэмэ диэххэ сөп. Бу күөгэйэр күҥҥэр сылдьан үлэлээбитиҥ, айбытыҥ-туппутуҥ сайдыыны, инники кэскили түстүүр.
Оттон биһиги Абыйбыт улууһугар билигин күөгэйэр күннэригэр айа-тута сылдьар дьонтон биирдэстэрэ, Майыар нэһилиэгин кэскиллээх ыччата, биир тумус туттар уоллара Вячеслав Бурцев буолар. Кини билигин төрөөбүт сиригэр төһүү үлэһит, общественник. Үтүө киһи алтыспыт дьонугар үтүө өйдөбүлү хаалларар.
Славаны кыра эрдэҕиттэн үөрэппит, үтүөҕэ-кэрэҕэ сирдээбит учуутала Надежда Константиновна Рязанская маннык этэр:
- Слава кыра эрдэҕиттэн активнай позициялаах оҕо. Барыга бары куруук айымньылаахтык сыһыаннаһар. Оскуолаҕа сылдьан оскуола лидерэ, эдэр кэрэспэдьиэн, чинчийэр үлэнэн бэрт үчүгэйдик дьарыктаммыт оҕо. Айар талааннаах. Дьоҥҥо көмөлөһөрүн сөбүлүүр. Бэйэтин тула хамсааһыны сөбүлүүр. Санаатын чопчу аһаҕастык этэр. Үлэтигэр бэриниилээх киһи.
Салгыы Вячеславы билсиэҕиҥ.
— Мин 1998 сыллаахха балаҕан ыйын 24 күнүгэр төрөөбүтүм. Майыар орто оскуолатыгар үөрэнэр кэммэр араас тэрээһиннэргэ кыттарбын олус да сөбүлүүр этим. Наставнигым, айар дьоҕурбун арыйбыт киһинэн Надежда Константиновна буолар. Үөрэнэ сылдьан улуустааҕы «Дьоҕур» оҕо хамсааһынын лидерынан талыллыбытым, Ил Дархан, улуус баһылыгын Елкаларыгар кыттыбытым. Оскуолабын 2016 сыллаахха бүтэрэн Дьокускайдааҕы тыа хаһаайыстыбатын колледжын Төҥүлүтээҕи филиалыгар киирбитим. Онно сылдьан Төҥүлү хор коллективыгар, Тиэхэлээхтэр диэн көр-күлүү народнай театрыгар сылдьыбытым. 2017 сыллаахха үөрэхпин бүтэрээт, 2 сылга Хабаровскайга сулууспалыы барбытым.
Контрагым бүтүүтүгэр Дьокускайдааҕы государственнай тыа хаһаайыстыбатын академиятыгар (билигин Арктическай государственнай агротехнологическай университет) ветеринар үөрэҕэр киирбитим. Үөрэнэ сылдьан общественнай тэрээһиннэргэ барытыгар көхтөөхтүк кыттан, факультетым устудуонньарын профсоюһун председателя, үөрэҕим устудьуоннарын председателын солбуйааччыннан, студсовет секретарынан үлэлии-хамныы сылдьыбытым. Киров, Ржев, Волгоград куораттарга баран, араас тэрээһин бөҕөтүн тэрийэн, элбэх табаарыстанан-доҕордонон үөрэнэ сылдьыбытым.
2022 сыллаахха академический отпуск ылан, Уус-Алданнааҕы ветеринария управлениятын Абыйдааҕы филиалын Майыар ветпунктун ветеринарнай бырааһынан үлэҕэ киирбитим. Үлэбин сөбүлүүбүн, бииргэ үлэлиир дьонум да күүс-көмө буолаллар, түгэнинэн туһанан Руслан Алексеевичка, Екатерина Михайловнаҕа, Карина Константиновнаҕа, уонна сырдык аатын ахтан-санаан ааһыам этэ, куруук илдьэ сылдьан үөрэппит, наставник буолбут Лариса Васильевна Софроновнаҕа барҕа махталбын тиэрдэбин.
2024 сылтан Майыар национальнай нэһилиэк дьаһалтатыгар сүрүн специалиһынан үлэҕэ киирбитим. Иван Иванович, Людмила Егоровна үөрэтиилэринэн кыра-кыралаан саҥа үлэбин баһыйан эрэбин. Билиҥҥи кэмҥэ билбэтим элбэх да буоллар, төрөөбүт дойдум дьонугар туох баар кыахпынан көмөлөһөбүн.
Слава оскуола эрдэхтэн айар дьоҕурдааҕын элбэх киһи билэр буолуохтаах. Бу дьарыгын билигин да умнубат.
— Хоһооннорум Надежда Васильевна Сидорова хомуурунньугар тахсыбыттара, олус диэн киэн туттабын.
— Нэһилиэк, улуус сайдыытын туһунан тус санаам диэн дьаһалта эрэ үлэлэтинэн буолбакка, дьон-сэргэ инициативалаах соҕус буоллаҕына өссө сайдыахпыт этэ диэн саныыбын. Кэлин нэһилиэк дьоно общественнай үлэҕэ кыттыыта мөлтөөн турар, ону кытары дьон көһүүтэ, эдэр ыччат кэлбэтэ ыарахаттары үөскэтэр. Биллэрин курдук, улууспут сайда турарыгар дьон бары кытыннахпытына, өссө да үрдүк сыаллары ситиһиэхпит этэ.
Лариса СЛЕПЦОВА.