Сайыҥҥы уһун сынньалаҥ кэмигэр үөрэх тэрилтэлэригэр үлэ тохтообот – кэлэр үөрэх сылыгар бэлэмнэнии түбүгэ. Ханна, туох үлэ ыытылларын улуустааҕы үөрэҕирии салаатын салайааччыта Александр Винокуровтан сырдатарыгар көрдөстүбүт.
— Кэлэр 2025-2026 үөрэх сылыгар улууска «Обеспечение жильем педагогических работников сельских школ, арктических и северных улусов» программанан Ураһалаах уонна Муҥурдаах оскуолаларыгар физика учууталларыгар квота көрүллүбүтэ. Бу күннээҕи туругунан Муҥурдаах оскуолатыгар физика учуутала көстө илик. Манна даҕатан эттэххэ, республика, Россия да үрдүнэн физика учууталлара олох тиийбэттэр. Холобур, бу сыл республикабытыгар 10 эрэ оҕо бу идэни бүтэрбит. Салгыы үлэлэһэбит. Социальнай ситим, официальнай сайтар нөҥүө физика учууталын көрдүүбүт.
Быйыл «Капитальный ремонт» федеральнай программанан өрөмүөннэнэр эбийиэк биһиги улууспутугар суох. Муниципальнай программанан улахан өрөмүөн үлэтэ Ураһалаах уһуйааныгар былааннанар. Үлэ саҕаланыахтаах.
Бүгүҥҥү күҥҥэ Кэбэргэнэ нэһилиэгин «Тугутчаан» уһуйаана өрөмүөннэнэн бүттэ. Уһуйаан сэбиэдиссэйэ Анна Михайловна уонна кэллэктиип инициативаларынан улахан үлэ ыытылынна. Түгэнинэн туһанан, Анна Михайловнаҕа уонна улууспут баһылыгар Владимир Вадимовичка махталбын этэбин.
«Тугутчаан» уһуйаан сэбиэдиссэйэ Анна Садовникова ыытыллыбыт үлэни сырдатта:
— Биһиги 1977 сыллаахха тутуллубут дьиэҕэ үлэлии олоробут. Дьиэбит муостатынан тымныы буолан, быйылгы үөрэх сылыгар оҥоһуллуон наада диэн улууспут үөрэҕириитин салалтатын начальнигар Александр Сергеевич Винокуровка уонна улууспут аҕа баһылыгар Владимир Вадимович Новиковка туруорсубуппут. Кыһалҕабытын өйдөөн, түргэнник икки өттүттэн үп көрөн көмөлөстүлэр, онно эбии бэйэбит дьаарбаҥка оҥорон эмиэ харчы киллэрбиппит. Матырыйаалбытын Дьокуускай куораттан ылбыппыт, тиэллэн кэлиитигэр эмиэ улуус уонна үөрэҕирии салалтата көмөлөстүлэр. Түргэн-тарҕан тустаах көмөлөрүн иһин үлэһиттэр уонна төрөппүттэр ааттарыттан улахан махталбытын биллэрэбит.
Дьиэбит муостатын көтүрэн, 4 хоһу ититиитин оҥордубут (халыҥатан биэрдибит). Сааскыттан саҕаламмыт сүрдээх түбүктээх үлэ этэҥҥэ түмүктэннэ диэн үөрэбит».
Ити курдук кылгас сайыҥҥа үөрэх саҥа сылын көрсөр тустаах үлэ ыытыллар. Былаан барыта ситиэ диэн эрэнэбит.
Слепцова Лариса.