Бу сыалга Тыа хаһаайыстыбатын уонна ас-үөл бэлиитикэтин министиэристибэтинэн Абый улууһугар түргэнник ситэр салааны уонна кинилэр аһылыктарын тиэрдиигэ 3,3 мөл солк тыырыллан турар.
Бу чэрчитинэн, Абый улууһугар «Полярные авиалинии» авиахампаанньа Ан-26 сөмөлүөтүнэн улуус олохтоохторун сайаапкаларынан көтөр фабрикаттан сымыыттыыр куурусса уонна концентрат аһылык аҕалылынна. Көтөрдөр бары ветеринарнай докумуоннаахтар.
Улуустааҕы тыа хаһаайыстыбатын управлениетын начаалынньыга Анисия Черемкина иһитиннэрбитинэн, дьиэ көтөрүн тиэйии толору кээмэйинэн барбыт. Уопсайа улууска 517 сымыыттыыр куурусса уонна 2 бөтүүк аҕалыллыбыт (санатан эттэххэ, былырыын 569 куурусса тиэрдиллибитэ). Куруссалар улуус бары нэһилиэнньэлээх пууннарыгар эрдэ бэриллибит сайаапкаларынан туттарыллыннылар:
- Абый нэһилиэгэр — 120;
- Мүҥурдаахха — 96;
- Майыарга — 142
- Уолбукка — 28;
- Ураһалаахха — 36;
- Оттоох Атахха — 15
- Белай Гора бөһүөлэгэр — 80 куурусса.
Тиэйиини «Сайдыы» ХЭТ (салайааччыта Руслан Стручков) тэрийэн толордо. Көтөрү кытта улуус киинин кэтэх хаһаайыстыбаларын сайаапкатынан 18 куул концентрат аһылык тиэрдилиннэ. Көтөрү сөмөлүөттэн түһэрээт, тута нэһилиэктэринэн тарҕаттылар.
Александра ЗАРОВНЯЕВА.