Майыарга «Киэн туттар биир дойдулаахпыт — Христина Хабарова» ахтыы киэһэтэ буолан ааста.
Хабарова Христина Николаевна — Үрэхчээнэ Абый улууһун биир биллэр айар үлэһитэ, публицист, прозаик, поэт, Россия уонна Саха Республикатын суруйааччыларын, суруналыыстарын союһун чилиэнэ, Саха Республикатын култууратын үтүөлээх үлэһитэ, Саха Республикатын телевидениетин, радиотын туйгуна, Сэбиэскэй Сойуус Геройа Н.А.Кондаков аатынан бириэмийэ икки төгүллээх лауреата, 10-тан тахса кинигэ ааптара.
Христина Николаевна биир дойдулаахтара, үөлээннээхтэрэ, кини талааныгар сүгүрүйээччилэр мустан, кини төрөөбүтэ 80 сылыгар анаан, таптыыр суруйааччыларын, биир дойдулаахтарын ахтан-санаан аастылар.
Биэчэри библиотекарь Надежда Сидорова арыйда. Салгыы Христина Николаевна автобиографиятын, айар үлэтин туһунан презентация көрдүлэр. Татьяна Слепцова кинилиин алтыспыт кэмнэрин истиҥник аҕынна, Үрэхчээнэ айымньыларыттан быһа тардыыны аахта. Маҥнайгы кылаастан бииргэ үөрэммит чугас дьүөгэтэ Акулина Слепцова Христина олоҕуттан сырдатта. Салгыы Л.В.Софронова, С.Д.Никулина санааларын үллэһиннилэр.
Биир дойдулаахпыт аатын үйэтитэргэ үлэ барара наадатын мустубут дьон тоһоҕолоон бэлиэтээтилэр.
Суруйааччы, суруналыыс Христина Хабарова туһунан викторина ыытылынна. Ахтыы киэһэ кыттыылаахтара автор кинигэлэрин уларыстылар.
Сусанна Никитина
Абый орто оскуолатын 8-9 кылааһын үөрэнээччилэригэр олохтоох балыыһа үлэһиттэрэ профилактическай бэсиэдэ ыыттылар, практическай дьарыктары көрдөрдүлэр. Тэрээһин олус туһалаах буолла диэн оскуола телеграм каналыгар суруйаллар.
Оҕолор медицина хайысхатынан үөрэх тэрилтэлэрин, специализацияларын, ханнык предметтэри чуолаан туттаралларын интэриэһиргээбиттэр. Бэсиэдэттэн элбэҕи билбиттэр.
Ону таһынан бастакы көмөнү хайдах оҥорорго, давление кээмэйдииргэ, күөмэйгэ ингаляция оҥорорго үөрэммиттэр.
Оскуола медицинскэй кабинета толору хааччыллыылааҕын бэлиэтииллэр. Элбэх саҥа оборудование, прибордар араастара эбии кэлбит.
Маннык көрсүһүүлэр инники да өттүгэр буолалларыгар баҕарбыттар. Балыыһа үлэһиттэрэ оҕолорго көмөлөһөргө куруук бэлэмин, балыыһа аһаҕаһын биллэрбиттэр.