Бу күннэргэ Абый улууһуттан 30-ча оҕо Москва куоракка баран «Россия талааннара» норуоттар икки ардыларынааҕы бэстибээл-куонкуруска кыттыыны ыллылар.
Ураһалаах оскуолатын ырыаһыт оҕолоро, «Сандаар» вокальнай ансаамбыл, бэстибээл-күрэххэ Муҥутуур кыайыылаах аатын сүктэ. Кыайыы өрөгөйүн билэн, оҕолор үөрүүлэрэ үгүс. «Сыралаах үлэбит сыаналанна – Гран-при үрдүк ааты сүктүбүт. Саала энергетиката, оҕолор бары биир киһи курдук ыллыыллара, үҥкүүлүүллэрэ барыта холбоһон маннык сыанабыл буолла. Долгуйуу, харах уута ханна барыай… Атын кыттааччылар «Сандаардарга» өйөбүл бөҕө буоллулар», — диэн салайааччы Альбина Соломова санаатын үллэстэр.
Ситиһии манан бүппэт. Салгыы Альбина Романовна үөрүүлээх сонунун маннык иһитиннэрдэ:
— Ваня Стручков, Ураһалаах орто оскуолатын үөрэнээччитэ, «Бары бииргэ» ырыаны дорҕоонноох куолаһынан сааланы урааҥхайдаан толордо, көрөөччүлэри ураты турукка киллэрдэ, 1 истиэпэннээх лауреат аатын ситистэ (салайааччы Галина Белоус).
Иккис бөлөх «Абый кэскилэ» Абый орто оскуолатын үөрэнээччилэрэ (салайааччылар Варвара Черемкина, Парасковья Никулина) улууспут фольклорун көрдөрөн, бэстибээл-күрэххэ туспа интэриэһи тарта. Чабырҕах, норуот ырыата, музыкальнай инструменнарга доҕуһуол саала иһин толордо. Түмүгэр оҕолор 1 истиэпэннээх лауреат аатын ыллылар.
Белай Горатааҕы оҕо искусствотын оскуолатын хореографическай ансаамбыла (салайааччы Арина Рязанская) самолеттан түһээт, тэрээһиҥҥэ баттастылар. Оҕолор маладьыастар, хомулла, таҥна-симэнэ охсон, үчүгэйдик толордулар уонна 1 истиэпэннээх лауреат аатын сүктүлэр.
Улахан дьон күрэҕэр Ураһалаах орто оскуолатын саха тылын учуутала Сахаяна Потапова «Айылҕа уһуктуута» фольклорнай композицияны толордо. Манна тойук туойулунна, хомус ньиргийдэ, норуот ырыата ылланна. Сахаяна Сергеевна 1 истиэпэннээх лауреат буолла.
Кэбэргэнэттэн кыттыбыт Кирилл Андреев эбээннии ырыатынан 1 истиэпэннээх Лауреат аатын ылла.
Дойду тэбэр сүрэҕэр ыытыллыбыт «Россия талааннара» бэстибээл-күрэххэ Сахабыт сирин култууратын үрдүк таһымҥа көрдөрдүбүт уонна үчүгэй сыанабылы ыллыбыт. Бу бары сыралаах үлэбит түмүгэ буолар. Барыгытыгар итии-истин эҕэрдэ!
Салгыы Абый улууһун делегацията өссө биир куонкуруска кыттыыны ыла Санкт-Петербург куоракка айаннаата. Күүскэ эппэппит, оҕолорбутугар ситиһиини баҕарабыт.
Александра ЗАРОВНЯЕВА.