2021 сыл ахсынньы 9 күнүгэр Ил Дархан Айсен Николаев Ыйааҕынан өрөспүүбүлүкэҕэ от ыйын 1 күнүгэр – Байыаннай дьайыы бэтэрээннэрин күнэ олохтоммута.
Бу күн байыаннай дьайыыларга дойду интириэһин саа-саадах тутан, өлөрү-өһөрү билиммэккэ, дойдуну көмүскээбит дьону чиэстиир күммүт. Бу бэлиэ күнү 2000 сыллар саҕаланыыларыгар Афганистан, Чечня уо.д.а. байыаннай дьайыыларга сылдьыбыттары санаан, кинилэр хорсун быһыыларыгар суолта ууран бэлиэтиир буолбуттар. Оттон билигин буола турар Анал байыаннай дьайыыга кыттыбыт, олохторун да толук уурбут дьоммутун санаан ааһыы — тыыннаахтар ытык иэспит.
Билигин буола турар Анал байыаннай дьайыыга улууспут бары нэһилиэктэриттэн уолаттарбыт сэриилэһэ сылдьаллар. Кинилэри өйүүр, көмөлөһөр араас хабааннаах үлэ ыытыллар.
Оттон бу күҥҥэ ити алдьархайдаах сэрииттэн демобилизацияланан кэлбит улууска биир соҕотох Егор Аркадьевич Слепцов баар. Кини туһунан хаһыат тохсунньу ыйдааҕы нүөмэригэр суруйан турардаахпыт. Егор 2023 сыллаахха саас кэлбитэ. Кэлэригэр анал байыаннай дьайыыга сылдьыбытын туоһулуур дастабырыанньата суоҕа, онон судаарыстыбаттан көрүллэр туох да көмөҕө тиксибэтэҕэ. Олус наадалаах докумуонун 2 сыл сыралаһан туран эккирэтиһэн дьэ, бу саас тутта.
Билигин кини үлэ үөһүгэр сылдьар
— Маннык анал күн баара үчүгэй эбит. Сэрии алдьархайын этинэн-хаанынан билбит дьоҥҥо тыыннаахтарга болҕомто ууруллара, өлбүттэри санаан ааһарга, наадыйар дьоҥҥо араас хабааннаах көмө оҥоһуллара үчүгэй, — диэн кылгастык санаатын үллэстэр. Егор Аркадьевич билигин Уолбуттааҕы станцияҕа үлэлии сылдьар. Быйыл күһүн буолаары турар нэһилиэк баһылыгын быыбарыгар туруорунар баҕалааҕын этэр.
Лариса СЛЕПЦОВА.