Кулун тутар 25-26 күннэригэр Амма улууһун Бөтүҥ нэһилиэгэр ССРС спордун маастара, СӨ үтүөлээх тренерэ, СӨ үөрэҕириитин, физкультураҕа уонна спорка туйгуна, Бөтүҥ нэһилиэгин Бочуоттаах олохтооҕо П.Д. Неустроев уонна көҥүл тустууга ССРС спордун маастарыгар кандидат, СӨ хапсаҕайга спордун маастара И.Д. Неустроев кэриэстэригэр ыытыллыбыт 2011-2017 сс. төрүөх уолаттарга көҥүл тустууга республикатааҕы турнир 150-ча эдэр тустуугу түмтэ.
Турнирга Дьокуускайтан куораттан, Мэҥэ Хаҥалас, Алдан, Үөһээ Дьааҥы, Аллайыаха, Абыйтан, Кэбээй, Амма улуустарыттан уонна Хатас нэһилиэгиттэн, уопсайа15 хамаанда кытынна. Манна 6-тан 14-гэр диэри саастаах бөҕөстөр 17 ыйааһыҥҥа туһуннулар. Турнирга Абый улууһун чиэһин спортивнай оскуола 8 иитилллээччитэ чиэстээхтик көмүскээтэ.
Турнир туһунан тренер Алексей Корякин санаатын үллэстэр:
– Дьэ, кыттааччылар бары да кыайардыы сананан кэлэн, бэрт сытыы, ыһыылаах-хаһыылаах киирсиилэри көрдөрдүлэр. Улахан дьоннор киирсиилэриттэн туох да атына суох киһини биир тэтимҥэ тутан олорор бэртээхэй турнир буолла. Бары сылдьыбыт, көрбүт дьон туох да астынан, эдэр бөҕөстөр киирсиилэрин сөбүлээн, хайҕаан тарҕастылар. Би7иги уолаттарбыт кыахтарынан бэркэ туһуннулар. Сытыы киирсиилэр түмүктэринэн Слепцов Марат II миэстэ,
Алексеев Лева III миэстэ,
Андреев Кирилл III миэстэ,
Черемкин Айсен III миэстэ буоллулар. Арчилан Степанов уонна Саяр Норатов бэйэлэрин ыйааһыннарыгар III миэстэҕэ киирсэн, V буоллулар.
Миэстэлэспиттэр грамота, мэтээл уонна харчынан бириэмийэ туттулар. Ону таһынан бастаабыт тустууктар сыаналаах бирииһинэн наҕараадаланнылар.
Уолаттар тренердэрин кытта быйыл төрдүс улахан республика таһымнаах түһүлгэҕэ кыттыылара. Аны кулун тутар 27 к. РСФСР норуотун үөрэҕириитин туйгуна Е.И.Черкашин иитиллээччилэрин бирииһигэр, Улуу Кыайыы 80, Аҕа дойдуну көмүскээччи сылларыгар аналлаах уолаттарга уонна кыргыттарга көҥүл тустууга XIV республикатааҕы аһаҕас турнирга 10 тустуукпут кыттыахтара.
Санатан эттэххэ, олунньу 18 к. спортивнай оскуола директора Александ Новиков, тренер Алексей Корякин салайааччылаах 15 тустуук уолаттар Дьокуускайга кэлэн дьарыктана, республика таһымнаах күрэхтэргэ кытта сылдьаллар. Бу биир күрэх түмүгүн да көрдөххө көрдөрүүлэр да үчүгэйдэр, ситиһиилэр да бааллар. Инники күрэхтэргэ кыттыыларын туһунан уонна тренердэри кытта кэпсэтиини хаһыат аныгыскы нүөмэригэр ааҕаарыҥ.
Түгэнинэн туһанан улууспутугар көҥүл тустуу сайдарыгар, оҕолор үүнэн-сайдан тахсалларыгар кыһамньыларын уурар салайааччыларга – улуус баһылыгар Владимир Новиковка, Майыар нэһилиэгин баһылыгар Иван Атласовка, уолаттар төрөппүттэригэр спортивнай оскуола коллектива хаһыат нөҥүө махталын тириэдэр.
Сусанна Никитина.