Сахаларга кырдьаҕастары булт аһынан күндүлээһин — өбүгэ саҕаттан кэлбит үтүө үгэс, ытык иэс уонна улахан убаастабыл бэлиэтэ.
Үтүө санаанан салайтаран, Белай Гораттан Екатерина Михайловна уонна Анатолий Коммунарович Чирковтар дьиэ кэргэннэрэ Аҕам саастаахтар аан дойдутааҕы күннэрин дэкээдэтигэр биир дойдулаахтарын, Абый нэһилиэгин кырдьаҕастарын, сибиэҺэй балыгынан күндүлээтилэр. Дьоҥҥо көмөлөһөр дьулуурдаах дьиэ кэргэн үтүөнү оҥорортон дуоһуйан, сыл ахсын бэтэрээннэри балыгынан күндүлүүллэрэ үтүө үгэс буолбут.
Өрүстэн, үрэхтэн тэйиччи олорор Абый нэҺилиэгин дьонугар сайын, күҺүн балык диэн күндү ас. Саастаах дьон үөрүүлэрэ муҥура суох. Үтүө санаа дьоҥҥо үөрүүнү, эрэли уонна сылаас сыһыаны бэлэхтиир.
Абый нэҺилиэгин дьаһалтата нэһилиэк бары олохтоохторун ааттарыттан Екатерина Михайловнаҕа, Анатолий Коммунаровичка БАРҔА МАХТАЛ тылларын этэллэр! Аан Дойдуга баар бары кэрэни баҕараллар. «Оҥорбут үтүө дьыалаларыгар кимтэн да тугу да эрэйбэккэ, дьоҥҥо куттуун-сүрдүүн тардыһан, киһиэхэ үтүөнү, ырааһы эрэ саҕар, ураты эйгэлээх дьон. Кинилэр Аһыныгас буолуу үтүө холобура буолаллар», — дииллэр Абый кырдьаҕастара.
Сусанна НИКИТИНА