Белай Гора гимназиятыттан кынат анньыммыт эдэркээн уолбут Раймонд Острохонскай дойдутун иннигэр ытык иэһин толорон анал байыаннай дьайыыга сылдьан суорума суолламмытыттан бары долгуйдубут, курутуйдубут.
Чаҕылхай, олус дьоҕурдаах уолбутун кэриэстээн, кини аатын үйэтитэн, волейбол күрэҕэ тэрилиннэ. Күрэх иннинэ күрэхтэһээччилэр, мустубут дьон 1 мүнүүтэ иһийэн, чуумпуран ыллылар. Раймонд туһунан ахтан-санаан аастылар. Биир дойдулаахтарын өйдөрүгэр-санааларыгар Раймонд элбэҕи эрэннэрэр спортсмен быһыытынан хааллаҕа.
Раймонд туһунан спорка уһуйбут учуутала, Белай Горатааҕы оҕо спордун оскуолатын волейболга тренерэ Сергей Ефремов кэпсиир: «Биһиэхэ VIII кылааска Нам улууһуттан кэлбитэ. Оҕолор бары киниэхэ таласпыттара. Лидер этэ. Раймонд сүрдээх эппиэтинэстээҕин көрөн, хамаанда хапытаанынан анаабытым. Сыыспатаҕым. Ону көрдөрөр биир чаҕылхай өйдөбүл хаалбыт. 2018 с. «Кубок Арктики» Муома, Аллайыаха улуустара кыттыылаах буолбута. Муома волейболистара өрүү күүстээх буолааччылар. Эрчиллиилэрин көрөн, сорохтор чаҕыйыах курдук буолбуттара. Уолаттарбын кытта кэпсэттим, хапытааммын дэлби күүркэттим (настройдаатым). Түмүгэр 3:0 ахсаанынан кыайбыттара. Онтон кынаттанан кыргыттарбыт эмиэ 3:0 кыайыыны ситиспиттэрэ. Үөрүүбүт муҥура суоҕа. Ити кыайыы Раймонд хапытаан быһыытынан сатабылынан ситиһиллибитэ. Кини көмүскээччи позициятыгар оонньуура.
Анал байыаннай дьайыыга баҕа өттүнэн баран эрэрин туһунан миэхэ эппитэ. Барыан иннинэ сибээстэһэ сылдьыбыта. Сайын сураҕа суох сүппүтүн дьиксинэ истибиппит. Онтон, хомойуох иһин, суорума суолламмытын биллэрбиттэрэ».
Күрэххэ икки хамаанда кытынна («Образование», «Пожарная часть»). Ыһыылаах-хаһыылаах оонньуу түмүгүнэн 3:0 ахсаанынан «Образование» хамаандата кыайыылаах буолла.
Бу тэрээһин бары өттүнэн талааннаах, чаҕылхай уолбут Раймонд — байыас сырдык аата ыччаттарга хорсун быһыы, модун санаа үтүө холобура буола турарыгар анаан тэрилиннэ. Байыаннай дьайыыга олоҕун толук уурбут, дойдутун чиэһин эрэллээхтик көмүскээбит Раймонд аатын хаһан да умнуохпут суоҕа.
Лариса Слепцова.