Бу күннэргэ «Андрей Жирков: Кыаллыбат диэн суох» саҥа кинигэ сүрэхтэниитэ улуустааҕы Киин библиотекаҕа буолан ааста. Тэрээһиҥҥэ Андрей Юрьевич чугас дьоно, олоҕун тухары бииргэ үлэлээбит, үлэ үөрүүтүн уонна ыарахаттарын тэҥҥэ үллэстибит доҕотторо-атастара, үөлээннээхтэрэ кыттыыны ыллылар.
Кинигэ хайдах айыллыбытын, туох ис хоһооннооҕун туһунан хомуйан, таҥан таһаарбыт редактор Н.Н.Петров ыраах Ростов-на-Дону куораттан ыыппыт видеота көрдөрүлүннэ. Уонна Андрей Юрьевич улахан кыыһа Анна Дьокуускай куораттан аҕатын туһунан хаартысканан оҥорон ыыппыт сюжета барыбытын долгутта.
Өссө биир долгутуулаах түгэнинэн А.Ю.Жирковка улуус социальнай-экономическай олоҕор килбиэннээх үлэтин, улахан кылаатын иһин «Абый улууһун Бочуоттаах олохтооҕо» аат кыра кыыһыгар Екатеринаҕа туттарыы буолла…
Улууспутугар убаастанар киһи, эппиэтинэстээх үлэһит, бөдөҥ предприниматель, сатабыллаах салайааччы Андрей Юрьевич Жирков элбэх киһиэхэ үтүөнү-өҥөнү оҥорбутун учуоттаан, кини сырдык аатын кэриэстээн, бу кинигэ күн сирин көрдө! Кини төлөннөөх үлэтигэр, сыратыгар-сылбатыгар, дойдутун туһугар кыһамньытыгар бар дьоно истиҥник махтанар. Саҥа кинигэ ааҕааччы сүрэҕин үөрдэ турдун, үүнэр көлүөнэҕэ, кэнчээри ыччакка үтүө холобур буолуохтун диэн ыалдьыттар баҕа санааларын тиэртилэр. Итиэннэ элбэх дьону кытта алтыһан, кинигэ күн сирин көрөрүгэр сүүрбүт-көппүт кыргыттарыгар Аняҕа, Катяҕа, редактор Николай Николаевич Петровка истиҥ махталларын биллэрдилэр.
Екатерина Соломова, улуустааҕы Киин библиотека кыраайы үөрэтэр салаа библиотекара.
Гаврил Ефимов, Белай Горатааҕы нефтебаза салайааччыта:
— Андрей Юрьевич курдук дойдутун ытыктыыр, өйдөөх, сатабыллаах үлэһит, ырааҕы өтө көрөр дьон ыччакка, кэлэр көлүөнэлэргэ үтүө холобур буолуохтаахтар.
Нефтебазаҕа үлэҕэ киириэхпиттэн үлэбитинэн элбэхтик көрсөр, алтыһар буолбуппут. Хонтуорабытыгар кэллэр эрэ, дьэ, кэпсээнин-сонунун ирэ-хоро, киһи эрэ истэ олоруох курдук сэһэргиирэ. Инники былааннарын да ыраланнаҕына туохтан да чаҕыйбата, куттаммата, саллыбата өтө көстөрө. Бэйэтэ да оннук киириилээх-тахсыылаах, кэпсэтиилээх, сырыылаах эр бэрдэ буолан, киниэхэ барыта табыллыаҕа диэн бүк эрэнэрбит.
Тэрилтэни салайыахпыттан үлэбитигэр дьиҥ чахчы күүс-көмө буолар киһибит Андрей Юрьевич буолар этэ. «Киһи киһини өйдүөхтээх, өйөһүөхтээх» диэн этэрэ, бэйэтин олоҕун сүрүнэ да оннук этэ. Ханнык да балаһыанньаҕа көмө көрдөөтөххө, хаһан даҕаны кыаллыбат диэбитэ суох этэ, куруук илиитин уунар, сүбэлиир буолара.
Андрей Юрьевич ханнык баҕарар техниканы хамнатарын киһи астына көрөрө, ол да буоллар кини өйдүүн-санаалыын, эттиин-хаанныын айылҕа оҕото этэ. Саха киһитин сиэринэн бултуура, айылҕаҕа сылдьан сынньанарын туохтан да ордороро. Бэйэтэ да наар этэр этэ: «Өбүгэлэрим сирдэригэр сылдьан сынньанан кэллэхпинэ эрэ дуоһуйабын, өйүм санаам сааһыланар, күүс-күдэх эбиллэр», — диэн.
Андрей Юрьевич Жирков сырдык, ыраас, чиэһинэй, эр киһиэхэ холобур буолар олоҕо умнуллуо суоҕа, мин киниэхэ куруук махтанабын, өйдүүбүн уонна олохпор кинини кытта алтыспыппынан киэн туттабын!
