Поэзия күнүн көрсө оскуолабытыгар «Поэзия. Иэйии. Рифма» диэн истиҥ көрсүһүү буолан ааста.
Бу күн биир дойдулаахпыт, оскуолабыт выпускнига, ИДьМ уонна СӨ доруобуйатын харыстабылын бэтэрээнэ, өрөспүүбүлүкэтээҕи «Айар кут» литературнай түмсүү чилиэнэ Евсеева Аксинья Афанасьевна-Өксөйөрдөөх Өксүү ыалдьыттаата. Оҕолорго, учууталларга кылгастык бэйэтин олоҕун, айар үлэтин билиhиннэрдэ, бииргэ үөрэммит доҕотторун көрүстэ. Соторутааҕыта «Иккистээн тиллии» диэн саҥа кинигэтэ Дьокуускай куоракка Арчы дьиэтигэр сүрэхтэммит. Ол тэрээhинтэн төрөппүт уола видеоклип оҥорбутун көрдөрдө. Маны таhынан бииргэ үөрэммит доҕоро, учууталбыт Анна Петровна оҕо уонна эдэр сааhын туhунан эмиэ видеоклибын көрдүбүт.
Бу биэчэргэ анаан оскуола иhинэн хоhоон күрэҕэ ыытыллыбыта. Нууччалыы, сахалыы төрөөбүт дойду туһунан хоһоон айан холоммуппут. Күрэҕи Аксинья Афанасьевна сыаналаабыта. Оҕолор айбыт хоhооннорун олус сэргээбитин эттэ уонна кыттыбыт оҕолорго барыларыгар туоhу суруктары, сэмэй бэлэхтэри туттарда. Оттон кыайыылаахтарга сыаналаах бириистэри аҕалбыт. Күрэх түмүгүнэн III миэстэни Оконешникова Настя, Бурцев Эльдар, II миэстэни Томская Анита ыллылар уонна КЫАЙЫЫЛААҔЫНАН Жиркова Сардаана ааттанным.
Аксинья Афанасьевна ыарахан ыарыыттан санаатын түһэрбэккэ эмтэнэн, үтүөрбүтүн, күн ахсын зарядкалыырын, салгыҥҥа хаамарын, тымныы уунан куттарын кэпсээтэ.
Оскуола педагог-библиотекарь Варвара Петровна Аксинья Афанасьевнаҕа оҕолор айбыт хоhооннорун хомуурунньугун, махтал суругу, өйдөбүнньүк бэлэҕи туттарда, оттон автор саҥа тахсыбыт «Иккистээн тиллии» кинигэтин оскуолаҕа бэлэхтээтэ.
«Кэнники сылларга айар үлэнэн үлүһүйэн дьарыктаммытым. Ордук айылҕаны, дьон бэйэ-бэйэҕэ сыһыанын, майгытын, олох-дьаһах тупсуутун туһунан хоһуйарбын сөбүлүүбүн. Дьиҥэ, оҕо сааспыттан кыралаан хоһоон суруйар этим. Ол эрээри дьиҥ хоһоон киэптээх айар үлэм 2015 с. саҕаламмыта. Бастакы хоһооннорум кинигэтэ 2015 с. күн сирин көрбүтэ»
Сардаана Жиркова, тнд А.Е.Слепцов аатынан АОО «Точка Роста» киин корреспондена.