Бу күннэргэ Абый улууһугар «мобильнай быраастар» биригээдэлэрэ кэлэн үлэлии сылдьар. Эмчиттэр үлэлэрин саамай ыраах нэһилиэктэн — Муҥурдаахтан саҕалаатылар.
Биригээдэҕэ терапевт, кардиолог, онколог, акушер-гинеколог, врач УЗД, эндокринолог, отоларинголог, невролог, пульмонолог бааллар.
«Бу сылга бастакыбытын кэллибит. Бу иннинэ ыарыыны булар соруктаах үлэлээбит буоллахпытына, билигин сахарнай диабеттаах, онкология ыарыытынан, артериальнай гипертониялаах, инсуллаабыт, инфарктаабыт учуокка турар ыарыһахтары кэтээн көрөн, эмтиир сыаллаахпыт.
Ордук үлэлиир саастаах уонна эр дьоҥҥо болҕомто ууруллар. Билэргит курдук, эр дьон бырааска улаханнык ыарыйдахтарына эрэ көрдөрүнэллэр. Ол иһин уролог-травматолог кэллэ», — биригээдэ салайааччыта иһитиннэрдэ.
«Сынньалаҥ кэмнэригэр быраастар олохтоох оскуола иһинэн үлэлиир музейга сырыттылар.
Үлэлэриттэн бириэмэ булан, нэһилиэк, улуус историятын интэриэһиргээн музейга болҕомтолорун уурбуттарыттан үөрдүбүт. Музейы сүрдээхтик болҕойон көрдүлэр, ыйыталаһан элбэҕи биллилэр», — диэн астына кэпсиир музей салайааччыта Анастасия Сорокоумова.
Быраастар салгыы Кэбэргэнэҕэ айаннаатылар. Манна олунньу 16-17 кк. үлэлиэхтэрэ.
Биригээдэ улууска бу ый 27-гэр диэри нэһилиэктэри барытын, улуус киинин хабан үлэлиэ.
Фото Анастасии Сорокоумовой.