Ааһан эрэр сыл үгүс элбэх түбүктэрдээх, ситиһиилээх буолла. Киһи саҥа сылга үктэнээри туран, бу ааһан эрэр сылга мин туох ситиһиилэнним, хайдах сыл ааһан эрэр диэн түмүк оҥостор. Биллэн турар, олох биир кэлим барбат, үөрүү да, хомолто да баар буолар. Тосхойбут үөрүүбүтүн алтыһар дьоммутун кытары үллэстэбит, үөрүүбүтүн кэпсиибит. Ааҕааччыларбыт «Ааспыт сыл эйиэхэ тугу биэрдэ? Саҥа дьылтан тугу күүтэҕин?» боппуруостарга эппиэттээтилэр.
Илья Новиков, Белай Гора олохтооҕо, РЭС үлэһитэ.
- Саҥа дьылтан чугас дьоммор эйэни, дьолу, сырдык олоҕу күүтэбин. Оҕолорбор бу ааһан эрэр сылга элбэх ситиһиилэммиттэрин курдук табыллыыны, биир дойдулаахтарбар бигэ доруобуйаны, тапталы, кэрэни эрэ баҕарабын.
- Биһиги ыалга таһаарыылаах сыл ааста. Ол курдук, мин кэргэммин кытта иккиэн үөрэхпитин бүтэрэн, диплом ыллыбыт. Иккиэн педагог идэтин баһылаатыбыт. Саамай үөрүүлээх сонуммут быйыл дьиэ кэргэммитигиэр эбиллии буолла. Төрөппүт оҕолорбут улаатан, уол оҕону ииттэ ыллыбыт. Элбэх оҕолоох дьиэ кэргэн буоллубут. Бэйэм атын идэҕэ, тэрилтэҕэ көһөн үлэлээн саҕалаатым. Бу барыта ааһан эрэр дьыл бэлэҕэ дии саныыбын.
Ефим Черемкин, Дьокуускайдааҕы уу транспорын институтун 4 кууруһун устудьуона (Якутский институт водного транспорта).
- Бастатан туран, Абыйым улууһун бар дьонугар кэлэн иһэр Саҥа 2026 сылынан итии-истин эҕэрдэбин тириэрдэбин. Барыгытыгар дьолу-соргуну, табыллыыны баҕарабын. Саҥа үүммут сылтан үөрэхпин ситиһиилээхтик бүтэрэрбин туохтааҕар да күүтэбин.
- Ааһан эрэр сылга саамай улахан ситиһиим — ЛОРП тэрилтэ генеральнай директора А.Ларионов үчүгэй үөрэҕим, үлэҕэ ситиһиилэрим түмүгүнэн Махтал сурук туттарда. Икки сыл тухары төрөөбүт Абыйым сиригэр навигацияҕа үлэлээбит тэрилтэм махтанан туран грамотанан наҕараадалаата. Олус үөрдүм, долгуйдум. Былырыын ЯРВПиС (Якутское речное водное пароходство и судоходство) п. Белая Гора «Путейский-119» суудунаҕа моторист-рулевойунан үлэлээбитим, быйыл ПАО «ЛОРП» ТО-600 диэн нефтеналивной суудунаҕа электрик-судовой уонна моторист-рулевойунан ыам ыйыттан алтынньыга диэри үлэлээтим. Бу үлэлээн баай уопут ыллым, билиим-көрүүм элбээтэ. Түгэнинэн туһанан, «ТО-600» судно экипаһын үлэһиттэригэр махталбын тириэрдэбин. Эһиил сайын улууспар кэлэн үлэлиир былааннаахпын. Абыйым улууһунан киэн туттабын, өссө да сайда туруон баҕарабын.
Полина Реброва, Абый нэһилиэгин олохтооҕо, эдэр педагог.
- Саҥа дьылтан киһи барыта элбэх кэрэни, соһуччу үөрүүлээх түгэннэри күүтэр. Мин эмиэ эрэнэ күүтэрим элбэх. Ол эрээри туох барыта кэмнээх. Кэмэ кэллэҕинэ, этэҥҥэ баран истэҕинэ барыта туолуо диэн эрэнэбин.
- 2025 сылга икки таптаһар сүрэхтэр холбоһон ыал буолбуппут. Чааһынай дьиэ ылынныбыт. Бу эмиэ улахан ситиһии, кыайыы.
Мария Захарова, Кэбэргэнэ олохтооҕо, оскуола техническэй үлэһитэ.
- Кэлэн эрэр сылтан саҥа дьолу, баҕа санаа туолуутун, бигэ доруобуйаны, чугас дьоммор ситиһиилэри баҕарабын.
- Ааһан эрэр сыл миэхэ үгүс кэрэ түгэннэри бэлэхтээтэ. Ол курдук, оҕолорум 3 сиэнчээни бэлэхтээн үөртүлэр. Сиэннэрим — саамай улахан бэлэхтэрим буолаллар.
Оксана Стручкова, Уолбут нэһилиэгин олохтооҕо, оскуолаҕа патриотическай иитии сүбэһитэ.
- Дьон бары саҥа сылтан туох эрэ дьиктини күүтэр. Мин эмиэ саҥа дьылтан элбэх кэрэни, үтүөнү, баҕа санаа туолуутун баҕарабын. Чугас дьонум доруобай эрэ буоллуннар. Дойдуга сэрии тохтоотун, эдэр ыччат олоҕо тубустун.
- Ааспыт сыл миэхэ элбэх умнуллубат түгэни бэлэхтээтэ. Соҕотох кыыһым ситиһиитэ үөрдэр. Кини — оскуола лидерэ, активист, спортсмен. Быйыл иккиэн «Экология начинается с семьи» диэн өрөспүүбүлүкэтээҕи экологическай акцияҕа кыттыбыппыт. «Зима начинается с Якутии» өрөспүүбүлүкэтээҕи уруһуй күрэҕэр Гран-При үрдүк аатын ылбыта. Ити ситиһиилэрин түмүгүнэн быйыл Ил Дархан Саҥа дьыллааҕы харыйатыгар сылдьан баҕа санаата туолла.
Анна ЧИРКОВА.