Үүнүү-сайдыы аартыгын арыйбыт Абый орто оскуолата — 110 сааһа!

Куорсун аспыт, кынат үүннэрбит тапталлаах оскуолабыт төрүттэммитэ 110 сыла туолар үбүлүойдээх киэһэтин бэрт истиҥник, сылаастык  бэлиэтээтибит.  Элгэс улууһугар бастакы оскуола историята сүрдээх баай, интэриэһинэй. Бу үгүс сыллар устата  бииртэн биир улахан уларыйыылар киирэллэр, үөрэнэр кыһабыт күнтэн күн үүнэр-сайдан иһэр.  Күн бүгүн техническэй наука доктора А.Е.Слепцов аатынан Абый  орто оскуолата улууска тарбахха баттанар оскуолалартан биирдэстэрэ. 

Сүдү кыһабыт 110 сыллаах историятыгар көмүс буукубанан суруллубут үтүөкэн дьоннорбут ааттара үйэлэргэ сүппэт. Кинилэр олорон ааспыт олохторо, үлэлэрэ үйэ тухары өйдөбүнньүк, киэн туттуу буолар. Ол курдук,  араас  сылларга үлэлээбит учууталлар, оскуола салайааччылара, Абыйбыт сайдар кэскилин түстээбиттэрэ:  Захарова Мария Ивановна, Архипова Анна Николаевна, Евсеева Мария Иннокентьевна, Стручкова Нина Егоровна, Никонов Василий Дмитриевич, Иванова Татьяна Сергеевна, Афонская Акулина Николаевна,  Новикова Анна Николаевна, Чиркова Люция Константиновна, Старостин Константин Иванович,  Старостина Антонина Иннокентьевна, Томскай Ариан Тимофеевич, Томская Анна Афанасьевна, Корякина Матрена Никифоровна,  Слепцова Анна Егоровна, Слепцова Марина Николаевна, Стручкова Светлана Дмитриевна, Стручкова Маргарита Ивановна, Никонова Ирина Васильевна уо.а.

Педагог-наставниктарбыт бу күҥҥэ диэри биһиэхэ күүс-көмө, сүбэ-ама буола олороллор. Иитэр-үөрэтэр үлэҕэ, оҕону төрөөбүт дойдутугар бэриниилээх, олорон ааспыт өбүгэ дьонун холобур оҥосторугар, үөрэтэригэр анаммыт «Абый нэһилиэгэ ХХ үйэҕэ», «Абый нэһилиэгэ ХХ үйэ иккис аҥаарыгар 1915-1999», «Абый нэһилиэгин олохтоохторун төрүччэлэрэ» диэн дириҥ ис хоһоонноох, суолталаах кинигэлэри ветеран учууталларбыт Томскай А.Т уонна Анна Афанасьевна үйэлэргэ умнуллубат  бэлэх ууммуттара.

Төһө да  киэҥ сайдыылаах сирдэртэн ыраах олордорбут, биһиги Абыйбыт чулуу уолаттара Абый начальнай оскуолатыгар үөрэнэн, Аан дойдуга тиийэ сураҕырбыттара,  ученай, государственнай салайааччылар буола үүммүттэрэ. Ол курдук, Слепцов Будимир Дмитриевич — Саха Республикатын үөрэҕириитин министрэ, Ефимов Виктор Петрович — Саха Республикатын экономическэй сайдыытын, баайга-дуолга сыһыаннаһыытын министрэ, Ефимов Никодим Николаевич — Ленинскэй премия лауреата, физико-математическай наукалар доктордара. Бырааттыы Слепцовтар: Аркадий Егорович, техническэй наука доктора, Ленинскэй  премия комсомолун лауреата, Саха Республикатын Государственнай премиятын лауреата, Лим Егорович,  Семен Егорович физико-математическай наука кандидаттара, Дохунаев  Василий Николаевич, биологическай наука кандидата.

Сүгүрүйэбит Аҕа дойду улуу сэриитин сылларыгар дойдубутун көмүскээбит Бережнов Алексей Констиантинович, Ефимов Гаврил Николаевич, Орлов Иннокентий Васильевич, Слепцов Константин Васильевич ааттарыгар.   Киэн туттабыт бүгүн  дойдубутун көмүскүүр анал байыаннай дьайыыга сылдьар  выпускниктарбытынан — Томскай Максим Арианович, Федоров Дмитрий Алексеевич, Соломов Михаил Олегович, Бережнов Гаврил Егорович, Чирков Константин Анатольевич, Никулин Дмитрий Дмитриевич, Ефимов Анатолий Николаевич.

Үбүлүөйдээх сылбытыгар анаан Дьокуускай куораттан выпускниктарбыт — Россия художниктарын Союһун чилиэнэ, Саха Республикатын культуратын үтүөлээх үлэһитэ, туйгуна Слепцов Михаил Николаевич, Саха Республикатын культуратын үтүөлээх үлэһитэ, туйгуна Стручков Николай Дмитриевич күндү ыалдьыт буолан кэлэн барбыттарыгар махталбыт мунура суох.

Учуутал, иитээччи идэтин баһылаан, төрөөбүт нэһилиэктэригэр кэлэн ситиһиилээхтик үлэлии-хамсыы сылдьар выпускниктарбытынан киэн туттабыт.  Алексеева Ульяна Дмитриевна,  Слепцова Сахаайа Ивановна,  Слепцов Софрон Эдуардович, Стручкова Анастасия Петровна, Черемкина Айыына Егоровна, Стручков Владислав Валерьевич, Реброва Полина Григорьевна, Новикова Туйара Гаврильевна, Дохунаев Владимир Степанович биһигини кытта тэҥҥэ үлэлии сылдьалларыттан  үөрэбит.

2023 үбүлүөйдээх сылбыт  Россия президенэ В.В.Путин ыйааҕынан «Педагог уонна наставник»  сылыгар түбэспитэ дириҥ суолталаах. Оскуолабыт иһинэн ыытыллыбыт тэрээһиннэр  барыта бу дьоһуннаах сылга ананан, үрдүк таһымнаахтык аастылар: “Педагог уонна наставник” сылын  үөрүүлээхтик арыйыы, ветеран учууталларга, педагогическэй үлэһиттэргэ «Саҥа кэм саһарҕатын ыспыт күндү учууталларбыт» дьоһуннаах брошюра тахсыыта, үөрэнээччилэр, төрөппүттэр, учууталлар үбүлүөйгэ  аналлаах 110 үтүө дьыала акциятыгар кыттыылара, «Дьоҕур» уолаттар волонтерскай этэрээттэрэ (сал. Дохунаев В.С.) республикатааҕы «Мы добровольцы» күрэххэ 2-с миэстэ буолуулара, учууталлар араас таһымнаах профессиональнай конкурстарга ситиһиилээхтик кыттыылара, научнай- практическай конференцияларга лауреаттары, призердары бэлэмнээһин уо.д.а.

Улуус биир кырдьаҕас оскуолата төрүттэммитэ 110 сылын бэлиэтиир бырааһынньыгынан өссө төгүл ис сүрэхтэн эҕэрдэлиибит,  оскуолабыт инникитин да үүнэ-сайда турдун, ыччаты үөрэтиигэ, иитиигэ үрдүк  аналын өрүүтүн да үрдүк таһымнаахтык, үтүө ситиһиилэрдээх толоро турдун диэн баҕа санаабытын  тиэрдэбит, сахалыы уруйдуубут-айхаллыыбыт.

Бу үтүө күммүтүгэр үөрүүбүтүн үллэстэ, анаан ыллыы-туойа  выпускниктарбыт ыалдьыттаатылар. Алексей Слепцов «Учууталбар», Екатерина Слепцова «Оскуолабар» ырыаларынан барыбытын долгуттулар, оттон Алина Никулина-Потапова бэлэх ууммут ырыалара мустубут дьону сөхтөрдө, салгыы бырааһынньыктааҕы фуршеты киэргэттэ. Түгэнинэн туһанан оҕолорбутугар махтал бастыҥ тылларын этэбит!

Анна Чиркова.