Мирослав Ефимов Абыйга дьон ыҥырыытынан, көрдөһүүтүнэн кыра үлэҕэ сылдьар.
Удамыр харчыга, аска дьиэ таһын күрдьэр, саас олбуор иһин, таһын хомуйар, оҕуруот буорун көпсөтөр, көбүтэр, хортуоска олордор, теплицаны ыраастыыр, мас хайытар, саһаанныыр. Кини өҥөтүн сүрдээх хаачыстыбалаахтык толорор, дьон иннигэр эппиэтинэһи сүгэрин өйдүүр.
«Хаама сылдьар уулуссабар бөх-сыыс сытарын сөбүлээбэппин, куруук хомуйа сылдьабын, субботниктарга көтүппэккэ кыттабын. Кыра эрдэхпиттэн ийэм, эбээм ыраас буоларга, ыраастык туттарга-хаптарга үөрэппиттэрэ», — диэн кэпсиир. Маны таһынан, Мирослав Дмитриевич чугас, билэр дьонун хондростарын, систэрин имэрийэр, массажтыыр. «Дьон абыранар, ыҥырар. Кыра эрдэхпиттэн эбээбин имэрийэрбин өйдүүбүн. Билигин доҕорбун кытта сиргэ сылдьабын, кыралаан балыктанабын. Айылҕаҕа сырыттахпына, ыарыыбын да умнабын, өйдүүн-санаалыын сынньанабын, ыраастанабын. Онон доҕорбор, Алексейга, миигин тэрийэн, оҕолоон, өйдөөн илдьэ сылдьаргар махтанабын».
Абый нэһилигэр социальнай үлэһитинэн Анна Бережнова үлэлиир. Тыа сиригэр социальнай үлэһит маһы, мууһу барытын дьаһайар, бородуукта атыылаһар, араас өҥө төлөбүрүн оҥорор, дьиэни-уоту, бэйэлэрин сууйуу о.д.а күннээҕи кыһалҕаларын чэпчэтиһэр уустук идэ буолар. Сыл аайы хас биирдии тэрилтэ доруобуйаларынан хааччахтаах дьоҥҥо бородууктанан, сибиэһэй уу аһынан, хаһаайыстыбаннай табаарынан көмө оҥороллор. Оскуолаҕа аһыныгас, үтүө санааланыы туһунан аахсыйалар, бэсиэдэлэр ыытыллаллар.
Анна ЧИРКОВА, Абый