Ураһалаахтар спортсаала тутуутун туруорсаллар

Отчуоту дьүүллэһиигэ Сутуруоха олохтоохторо нэһилиэккэ тыын суолталаах боппуруоһунан аныгылыы тииптээх оскуола спорт саалатын тутуута буоларын ыйдылар. Ол курдук, билигин физкультура уруога оскуола дьиэтин көрүдүөрүгэр ыытылларын эттилэр. Онон аҕа баһылыктан бу итэҕэһи туоратарга «Үөрэҕирии» федеральнай нацбырайыак чэрчитинэн үлэлэһэллэригэр көрдөстүлэр. Маны сэргэ уһуйаан дьиэтэ эмиэ эргэрэн, муостата күөрэ-лаҥкы баран, олус тымныытын бэлиэтээн туран, өрөмүөн ыыталларыгар, благоустройство киллэрэллэригэр туруорустулар.

Уопсайынан сэргэх кэпсэтии буолла. Тыл этээччилэр нэһилиэк бэкээринэтин технологическай тэриллэрин саҥардыыга, «Совхозная» уулусса сүрүн ититии трассатын өрөмүөнүн уонна тирэҕин уларытыыга үлэни ыыталларыгар, кытаанах бөҕү-саҕы таһар анал техниканы булунууга уонна атыылаһыыга көмө оҥоһулларыгар баҕа санааларын тириэртилэр.

Быраас боппуруоһа манна эмиэ көтөҕүлүннэ. Доруобуйа министерствота баар, күннэтэ көрсүллэр кыһалҕаны уонна аллараа сүһүөх медицинскэй үлэһиттэринэн хааччыллыыны хонтуруолга ыларыгар көрдөстүлэр. Ону тэҥэ, Ураһалаах нэһилиэгин бюджетын нэһилиэк дьонугар быһааран сырдаталларыгар эттилэр. Мунньахха 40-ча киһи кыттыыны ылла уонна улуус дьаһалтатын үлэтин биһирээбиттэрин биллэрдилэр.