Билиҥҥи кэмҥэ хас биирдии нэһилиэккэ оскуола сайдыы киининэн буолуохтаах. Онно туһуланан, национальнай бырайыак чэрчитинэн, араас хайысхалаах бырайыактар олоххо киирэллэр. Бу хайысханан улуус оскуолаларыгар сылын аайы саҥа аныгылыы хааччыллыылаах үөрэх эйгэтэ тэриллэр. Бу барыта национальнай бырайыак чэрчитинэн ыытыллар уонна сайдыылаах аныгы кэм ыччата үүнэн-сайдан тахсарыгар төһүү күүс буолар.
Балаҕаны ыйын 1 күнүгэр Ураһалаах орто оскуолатыгар “Үөрэҕирии” национальнай бырайыак чэрчитинэн “Аныгы оскуола” федеральнай бырайыак иһинэн “Үүнүү туочуката” (“Точка Роста”) диэн естественнэй-научнай уонна технологическай хайысха киинин үөрүүлээхтик арыйыы буолла. Үөрүүлээх тэрээһиҥҥэ аалай кыһыл лиэнтэни оскуола дириэктэрэ Изольда Стручкова, «Арктика учуутала” бырагыраамманан бу үөрэх дьылыгар саҥа үлэлии кэлбит биология химия учуутала Саина Самсонова уонна туйгун үөрэнээччи Миша Стручков кырыйан, «Үүнүү туочуката» арыллыбытын бигэргэттилэр.
Ураһалаах агрооскуолата өрөспүүбүлүкэбит биир тэтимнээхтик сайда турар үөрэҕин кыһатынан буолар. Кэлэктиип Россия, республика ыытар араас үөрэх бырагыраамаларыгар ситиһиилээхтик кыттар. 2022 сыллаахха цифровой үөрэхтээһин эйгэтэ (цифровая образовательная среда) бары ирдэбиллэргэ эппиэттиир гына тэриллэн үлэҕэ киирбитэ. Оскуола материальнай өттүнэн, аныгылыы оборудованиенан хааччыллыылаах буолуутугар төһүү күүс буолбута.
Бу туһунан Ураһалаах орто оскуолатын дириэктэрэ Изолдьа Иннокентьевна билиһиннэрэр:
- Билии күнүгэр биһиги оскуолабытыгар маннык киин арыллан, сүрдээх долгутуулаах, үөрүүлээх түгэн буолла.
Манна сүрүн сыал-сорук диэн, үөрэх хаачыстыбатын үрдэтии буолар. Ону тэҥэ үөрэнээччилэргэ аныгы естественнай, научнай, технологическай үөрүйэхтэри иҥэрии эмиэ киирэр. Оҕолор физика, биология, химия предметтэригэр билиилэрин-көрүүлэрин хаҥатыахтара. Кинилэр эбии дьарыктарга уонна үөрэхтээһин куруһуоктарыгар чинчийэр үлэнэн дьарыктаныахтара, саҥа сатабыллары баһылыахтара.
Бу арыллыбыт естественнэй-научнай хайысхалаах үөрэх киинэ саҥа мебелинэн, цифровой анал оборудованиенан, робототехниканан, прибордарынан, реактивтарынан хааччылыа, ити барыта уу суолунан айаннаан иһэр.
«Үүнүү туочукатын» бары учууталларыгар, үөрэнээччилэрбитигэр, төрөппүттэрбитигэр ситиһиилээх үлэни баҕарабын. Сайдыы суола аһаҕас, араас сатабыллары баһылаан, сайдыыга хардыылаан иһиэҕиҥ!
Маны сэргэ оскуола үлэтин былааныгар саҥа хайысхалары, тосхоллору ылынар. Бу барыта аныгы кэм ыччата сайдыылаах, билиилээх, киэҥ көрүүлээх буолуутугар туһуланаллар.
Александра Заровняева.