Уолбут устудьуоннара

Тохсунньу 25 күнэ – Татыйааналар күннэрин кытта Устудьуон күнүн бэлиэтиир үгэс баар. Устудьуоннуур кэм эдэр саас эриэккэс кэмнэрин кытта үүнэр-сайдар идэ ылар олохпут биир чаҕылхай кэрдииһэ. Бу бэлиэ күҥҥэ анаан Уолбут нэһилиэгиттэн төрүттээх устудьуоннары кытта кэпсэттим.

Кира Слепцова, 9-с кылаас кэнниттэн үөрэххэ киирбитэ.

— Мин И.И. Фадеев аатынан финансовай-экономическай колледжка былырыын туттарсан киирбитим, бухгалтер идэтигэр үөрэнэбин. Кыра эрдэхпиттэн эбээм бу хайысхаҕа салайбыт уонна оскуолаҕа математика предметин ордорор буоламмын, ханнык идэҕэ үөрэнэ барарбын эрдэттэн билэрим.

Тохсус кылаас кэнниттэн устудьуоннуур ыарахан. Биир үксүн режим өттүнэн уонна дьиэ усулуобуйатын кэнниттэн уопсайга олоруу. Ким да эйиэхэ оҥорон биэрбэт, бэйэҕин бэйэҥ көрүнэҕин. Харчыны сатаан туттарга эрдэттэн үөрэниэххэ наада эбит дии санаатым. Биир өттүнэн элбэх доҕордоноруҥ үчүгэй. Үөрэх кэнниттэн бэйэни сайыннарарга араас куруһуоктар бааллар. Мин кытай тылын интэриэһиргээн сылдьабын. Ырыанан да дьарыктанан көрбүтүм. Ааҕарбын олус сөбүлүүр буоламмын «Библиотека доҕотторо» диэн түмсүүгэ баарбын.

9-с кылаас кэнниттэн устудьуоннуу барыан баҕалаахтарга эрдэттэн талбыт идэҕит, үөрэнэр кыһаҕыт туһунан билиҥ, үөрэтиҥ. Бэйэни көрүнэргэ үөрэниҥ. Режими тутуһарга бэйэҕитин эрчийиҥ диэн сүбэлиибин.

 Салгыы Оля Новгородованы истэбит.

— Дойдум дьоно, дорооболоруҥ. 2020 сыллаахха С.Ф. Марков аатынан Уолбут орто оскуолатын кыһыл көмүс мэтээлинэн бүтэрбитим. Биир кэлим эксээмэннэрбин ситиһиилээхтик туттаран М.К. Аммосов аатынан Хотугулуу-Илиҥҥи федеральнай университет Естественнай наукалар институттарын биология уонна химия салаатын устудьуона буолбутум. Билигин 5-с курска үөрэнэбит. Быйыл биология уонна химия учууталын идэтин ылыахтаахпын.

Үөрэҕим таһынан «Профориентолог», «Лаборант химического анализа» эбии идэлэргэ үөрэнним. Былырыын муус устарга институтум директорыттан «Лучшая староста педагогического отделения» махтал суругу туппутум. Институкка ыытыллар химия, биология олимпиадаларыгар, научнай конференцияларга ситиһиилээхтик кыттабын. Араас тэрээһиннэргэ дьүүллүүр сүбэ састаабыгар киирэбин, «Олимп» спорт комиссиятыгар үлэлиибин.

Быйыл үөрэхпин бүтэрдэхпинэ магистратураҕа киириэм, салгыы үөрэниэм диэн былааннаахпын.

 

Нил Виктор Дохунаев.

Оскуола эрдэхтэн араас култуурунай тэрээһиннэргэ кыттар. Аркадий Егоров салалтатынан хомуска уһуйуллубута, республика, Россия таһымнаах араас күрэстэргэ кыттар.

—Тыа хаһаайыстыбатын техникумугар «Эксплуатация и ремонт сельско-хозяйственной техники и оборудования» салааҕа 3-с курска үөрэнэбин. Быйыл үөрэхпин бүтэрэбин. Уопсайга олоробун, усулуобуйата үчүгэй.

Иллэҥ кэммэр волейболлуубун, футболлуубун, араас күрэхтэһиилэргэ хамаанда састаабыгар киирэн кыттабын. Үҥкүүнэн эмиэ дьарыктана сылдьыбытым. Маны таһынан оскуола эрдэхтэн хомустуубун. Быыс көһүннэҕинэ, аҕыннахпына ылан оонньуубун. Аммаҕа буолбут Олоҥхо ыһыаҕар улуус делегациятыгар киирэн, хомусчуттар күрэстэригэр кыттыбытым. Былырыын үөрэхпит иһинэн салаалар икки ардыларыгар ыытыллыбыт «Мистер ЯСХТ» күрэскэ кыттыбытым. «Мистер спорт» анал аакка тиксибитим.

Быйыл үөрэхпин бүтэрэбин. Салгыы армияҕа барыам. Кэллэхпинэ өссө да үөрэниэхпин баҕарабын. Бириэмэ көрдөрүө.

Уопсайынан устудьуон кэмнэр киһи олоҕор чаҕылхай кэмнэр эбит.

Бары устудьуоннарга сессияларын этэҥҥэ түмүктүүллэригэр, быйыл бүтэрээччилэргэ эксээмэннирин ситиһиилээхтик туттаран диплом ылалларыгар баҕарабын.

 Ити курдук С.Ф.Марков аатынан Уолбут орто оскуолатын араас сылларга бүтэрбит, билигин республикабыт араас үөрэх кыһаларыгар үөрэнэ сылдьар устудьуоннар күннээҕи олохторун сырдаттылар.

Бу бэлиэ күнүнэн Абыйбыт сириттэн төрүттээх устудьуон оҕолорбутугар эҕэрдэ буолуохтун. Ситиһиилээх үөрэҕи, бигэ туругу баҕарабыт уонна дойдугутун-дьоҥҥутун кытта ситими ханна да сырыттаргыт быһымаҥ, төрөөбүт түөлбэҕит инники сайдыыта эһигиттэн тутулуктааҕын умнумаҥ диэн баҕа санаабытын тиэрдэбит.

 

Лариса СЛЕПЦОВА.