Аҕыйах хонугунан Сардааналаах Амма улууһугар өрөспүүбүлүкэтээҕи Олоҥхо ыһыаҕа ыһыллан, дьон-сэргэ тоҕуоруһа мустуо. Бэс ыйын 19-21 күннэригэр үгүс тэрээһин ыытыллара күүтүллэр. Ол курдук, араас быыстапкалар, спортивнай, култуурунай күрэхтэр үс күн устата тиһигин быспакка буолуохтара. Сабаҕалааһын быһыытынан, 10 тыһыынчаттан тахса киһи кэлэн, кыттыаҕа, көрүөҕэ-истиэҕэ.
«Кыттааччылары түһэрэргэ 32 социальнай эбийиэк бэлэмнэнэр. 10 тыһыынча миэстэлээх балаакканан түһүү тэриллиэҕэ. 80-тан тахса тэрээһин баар буолуо.
Абый улууһа Аммаҕа ыытыллар Олоҥхо ыһыаҕар бэлэмнэнэр. Дьоммут араас быыстапкаларга, оһуохай, тойук, хомус, дэгэрэн ырыаны толоруу куонкурстарыгар кыттыахтара.
«Уопсайа 25 киһилээх делегация улуус баһылыгын Владимир Новиков салалтатынан кыттара былааннанар. Олоҥхо ыһыаҕын сүрүн күрэхтэринэн — олоҥхо уонна оһуохай түһүлгэлэрэ буолуохтара. Тойук күрэҕэр Татьяна Иванова, оһуохайга — Аркадий Егоров, хомуска — Нил-Виктор Дохунаев, һээдьэҕэ — Евдокия Черемкина, Дэгэрэҥ ырыаҕа — Иннокентий Черемкин, Николай Максимов, Нюргуяна Унарова кыттыахтара
Оройуоммут визитката — «Кыраһа» норуодунай ансаамбыл — барара былааннанар. Быыстапкалары республикаҕа биллэр маастардарбыт Василий Спиридонов, Татьяна Макарова, Николай Ефимов, Алексей Климовскай, Альбина Шкулева, Клара Черемкина, Мария Никулина, Снежана Тимофеева, Аина Скрябина уус-уран оҥоһуктара киэргэтиэхтэрэ.
Дьокуускай куораттан Аммаҕа диэри барыы-кэлии ороскуотун, аһылыгын улуус дьаһалтата уйунна», — диэн улуустааҕы култуура методиһа Екатерина Соломова кэпсээтэ.
Олоҥхо Ыһыаҕа 2006 сылтан ыытыллар. Бу култуурунай, духуобунай бырааһынньыгы көрсө улуустарга саҥа социальнай эбийиэктэр тутуллаллар, култуура тэрилтэлэрин матырыйаалынай-техническэй баазалара тупсарыллар, суол-иис оҥоһуллар. 2025 сылга Олоҥхо Ыһыаҕа Нерюнгри оройуонугар ыытыллыаҕа.
Александра ЗАРОВНЯЕВА.