Улуус баһылыгын отчуота – Муҥурдаахха

Тохсунньу 10 күнүгэр Муҥурдаах нэһилиэгэр улуус баһылыга Новиков Владимир Вадимович сыллааҕы отчуоттуур мунньаҕа буолан ааста. Отчуоттуур мунньахха култуура управлениетын начальнига, улуус мунньаҕын председателэ Айталина Унарова, Белай Гора бөһүөлэгин депутаттарын Сэбиэтин бэрэссэдээтэлэ Новикова, улуус тэрилтэлэрин салайааччылара  кыттыыны ыллылар.

Баһылык отчуотугар улуус бары тэрилтэлэрин үлэлэрин хабан, презентацияҕа көрдөрөн, нэһилиэнньэҕэ сырдатта. МФЦ, ростелеком үлэлэрэ, тыа хаһаайыстыбата, оҕо сынньалаҥа, оскуола тутуута, саҥа тутуулар хаачыстыбаларын туһунан, бырааспыт миэстэтигэр үлэтин уо. д. а. атын боппуруостарга отчуот кыттыылаахтара эппиэт биэрдилэр.

Айталина Унарова: “Быйылгы сылтан  “Земский работник культуры” диэн программа тахсарын бары кэтэһэн олоробут. Республикаҕа 22 млн. көрүллүөхтээх. Ол аата 11 улууска биирдии үлэһит барар. Кинилэр хас биирдиилэрэ 2 млн. ылыахтара.  Бу программа үлэҕэ киирдэҕинэ, эһиил, биһиги улууспут хабыллыаҕа диэн эрэнэбит”, – диэбитин үөрэ иһиттибит.

Олорор нэһилиэкпит улуус кииниттэн ыраах сытарын да быһыытынан хас сыл ахсын быраас үлэтин боппуруоһун көтөҕөбүт. Кумааҕыга сурулларынан, отчуокка да ахтылларынан эмиэ да быраастаах курдукпут. Ол эрээри бырааспытын миэстэтигэр үлэлэппэккэ, улуус киинигэр ылан бара туралларыттан дьон сылайда. “Олунньу ыйга, правительство отчуотун эрэ иннигэр үлэлэтэн баран төттөрү ылыахтара” диэн этэллэрэ оруннаах. Баар суол.  Саҥа кылаабынай быраас Михаил Игнатьев мустубут дьон иннигэр: “Бырааскытын олунньуга ыытабыт, онон олох куттанымаҥ. Аны ылыахпыт суоҕа”, – диэн тылын биэрдэ. Дьэ, хайыыллар, көрүөхпүт… Эмиэ эрэнэ хаалар буоллахпыт.

Өссө биир, эмиэ сыл ахсын туруорсар боппуруоспутунан саҥа оскуола буолар. Урут этиллибитинэн, 2026 сылга инвеститиционнай программаҕа киирэн, үлэтэ саҕаланар диэн этэ. Ол эрээри 3 сыл иһигэр тутуу барбат диэн Надежда Корякина иһитиннэрдэ. Баһылык уочаракка бааргыт, кэпсэтии, туруорсуу барар диэн уоскутта. Кини оскуола билиҥҥи туругун барытын билэн олорор. Дьиҥэр, биһиги оскуолабыт улууска саамай маҥнайгынан тутуллубут оскуола буолар. Үчүгэйдик көрүллэрин  эрэ иһин, туруктаах курдук көстөр эрээри, күн-дьыл кинини да баттыыр, сытытар, эмэҕирдэр. Онон суһал үлэ барыан наада.

Быйылгы сыл үөрэҕирии эйгэтигэр “Оҕо сынньалаҥын сылынан” биллэриллибитэ. Бу сылтан эмиэ элбэҕи эрэнэбит. ТЖС, СОП учуокка турар дьиэ кэргэн суоҕун быһыытынан, социальнай харалтаттан биһиэхэ көмө суох буолар диэтилэр. Оскуола аайы, миэстэтигэр, хас сайын ахсын үлэлиир лааҕырдар тэриллэллэрин таһынан, ханнык эбии сынньалаҥ баар буолуой? Киин сирдэргэ сынньанар квота ахсааннаах кэлэр.

Улууспут иһинэн уолаттарга аналлаах патриотическай хабааннаах, сиргэ-уокка сылдьан сайдар, үөрэнэр лааҕыр үлэлиирэ, эбэтэр төрөөбүт сирдэрин-дойдуларын үөрэтэр Ожогино күөлгэ дуу, Полоуснайга дуу, атын да сирдэргэ  экспедициялар тэриллэллэрэ, саас, сайын Улахан Сискэ айан баара буоллар, төһө эрэ үчүгэй буолар этэ! Хас биирдии оскуолаттан, нэһилиэк ахсыттан, кэлбит оҕолор мустан сынньанар, сайдар усулуобуйалара бу сылга тэриллэрэ буоллар диэн баҕа санаалаахпын.

Улуус баһылыгын отчуотун истэн баран, хас биирдии сылдьыбыт киһи бэйэтэ түмүк оҥостор. Кырдьык, билигин үлэлииргэ олус ыарахан. Политикаҕа араас сыһыаннар, СВО, дьыл уларыйыыта кытта, айылҕа моһоллоро, тутуу, эргиэн, айан-сырыы уо. д. атын элбэх араас хайысхалары тэҥҥэ тутан, сайыннаран, дойдум туһа, дьонум иннэ диэн үлэлээтэххэ  эрэ, түмүктээх үлэ баар буоларын бары билэбит. Онуоха хас биирдиибит үлэлиир дьоҥҥо көмөлөөх, өйөбүллээх буолуоҕуҥ.

Анастасия Сорокоумова, Сыаҥааннаах