Улуус баһылыгын отчуота – Абый нэһилиэгэр

Тохсунньу 9 күнүгэр Абый улууһун баһылыга Владимир Новиков 2024 сыллааҕы үлэтин түмүгүн отчуотун Абый нэһилиэгиттэн саҕалаата.

 

Отчуотуур бөлөххө улуус управлениеларын, тэрилтэлэрин салайааччылара, солбуйааччылара, исписэлиистэрэ кыттыыны ыллылар.

Элбэх хайысхалаах култуура киинигэр 40-ча киһи отчуоту истэ кэллэ. Владимир Вадимович быйыл улууска ыытыллыбыт үлэни хайысхаларынан сиһилии билиһиннэрдэ. Отчуоттуур мунньаҕы нэһилиэк баһылыга Тимофей Томскай арыйан, дьонун-сэргэтин көхтөөхтүк бэйэлэрин санааларын үллэстэригэр ыҥырда.

Олохтоохтор сүрүннээн тыа хаһаайыстыбатынан дьарыктанар дьону мунньан мунньах тэрийиитин ыытарга, ааспыт сылга кэнчээри от үүммэккэ, сылгылар туруктара мөлтөҕүн, тыа хаһаайыстыбатын дьаарбаҥкатын ый устатыгар ыытарга, демография таһыма түһэ турарын туһунан этиннилэр. Улуус киин балыыһата материальнай-техническай базата мөлтөҕүн, рентген аппарата суоҕун, быраастар тиийбэттэрин ыйдылар. Гинеколог быраас суоҕуттан оҕолонор дьахталлар олус эрдэ дьиэлэрин-уоттарын, оҕолорун хаалларан, Дьокуускай куоракка баралларын ыйдылар.

Онкологиянан ыалдьар оҕоҕо уонна кинини арыаллыыр киһиэхэ бырайыас төлөнүүтүн, быйыл тиэрдиллиэхтээх сыллааҕы таас чох лимитин улаатыннарыы туһунан ыйыталастылар.

Мунньах түмүгэр улуус баһылыга ыйытыыларга хоруйдаан баран, нэһилиэк олохтоохторо анал байыаннай дьайыы кыттыылаахтарыгар күүс-көмө  буолалларыттан астынарын эттэ, махтанарын биллэрдэ.

Александра ЗАРОВНЯЕВА.