Бүгүн, табаһыт күнүгэр, Кэбэргэнэҕэ «Ахтан-санаан ааһыаҕыҥ» диэн удьуор табаһыт Гаврил Гаврильевич Хабаров сырдык кэриэһигэр аналлаах ахтыы киэһэтэ буолан ааста. Баара буоллар кулун тутар 1 к. 70 сааһын туолуо этэ.
Эдэр табаһыт Соцкуоталаһыы кыайыылааҕа этэ. Үлэтигэр үрдүк ситиһиилэрин иһин Комсомол Киин комитетын бэлиэтинэн, араас таһымнаах Грамоталарынан наҕараадаламмыта.
Тэрээһини бэйэтин ахтыытынан эдьиийэ Мария Гаврильевна саҕалаата. Салгыы Гаврил Гаврильевиһы билэр, бииргэ үөскээбит, алтыспыт доҕотторо, аймахтара истиҥ-иһирэх тылынан аҕыннылар.
Гаврил бастыҥ табаһытын таһынан айар дьоҕурдааҕа. Хоһоон, ырыа айара. Бу киэһэ кини суруйбут хоһооннорун аахтылар, айбыт ырыаларын ыллаатылар. Гаврил Гаврильевич туһунан презентация уонна табалар үҥкүүлэрэ бу киэһэни киэргэттилэр.
Тэрээһини «Эдек» этно-кульуура киинин исписэлииһэ Анна Алексеева ыытта.
Надежда Сидорова, Кэбэргэнэ.