Күндү биһиги бэтэрээннэрбит, уопсастыбаннай кэрэспэдьиэннэрбит, эрэдээксийэлэр кэлэктииптэрэ уонна биһиги эрэллээх ааҕааччыларбыт, эһигини Арассыыйа Бэчээтин күнүнэн эҕэрдэлиибин!
Тохсунньу 13 күнэ — Россия бэчээтин күнэ — биһиги күннээҕи олохпутугар олус суолталаах түгэн. Былыргыттан билиҥҥи үйэҕэ тиийэ дойдуга, республикаҕа, улууспутугар туох-ханнык быһыы-майгы, уларыйыы-тэлэрийии буола турарын, саҥа-эргэ эргийиитин хаһыаттан, сурунаалтан ааҕан билэ олоробут.
Төрөөбүт-үөскээбит, олорор, үлэлиир-хамныыр тапталлаах улууспутугар республика биир кырдьаҕас хаһыата — «Хотугу кыым» — Абыйбыт улууһун олоҕун-дьаһаҕын 72 сыл устата сырдатан, дьонун-сэргэтин туһунан кэпсээн-сэһэргээн, сырдатан кэллэ.
Күндү ааҕааччыларбыт, эһигини — сиэр-майгы, төрүт үгэстэри салҕааһын, норуот уус-уран айымньытын үйэтитии, бэйэ оҥорон таһаарыытын, улуус тэрилтэлэрин үлэлэрин, бэйэбит дьоммут дьарыктарын-үлэлэрин ааҕааччыга тиэрдиигэ дьон-сэргэ биһирэбилин ылбыт кэккэ кэрэхсэбиллээх үлэлэрдээх аныгылыы көрүүлээх суруналыыстарбыт ааттарыттан Бэчээт күнүнэн истиҥник эҕэрдэлиибин!
Ааспыт сыл биһиги хаһыаппытыгар балачча ситиһиилээх, сонун хамсааһыннаах түгэннэри бэлэхтээтэ. Ол курдук, бэтэрээн общественнай корреспондеммыт Любовь Худаева Абый улууһун 122 киһитин туһунан урут хаһыакка суруйбут матырыйаалларыттан таҥыллыбыт «Времена не выбирают» кинигэтэ сүрэхтэннэ, «Мэхээлэчээн булчут» диэн биир дойдулаахпыт, общественнай корреспондент Яков Стручков кыттыгас суруйуулаах бэртээхэй айымньы киинэ буолан быйыл сэтинньи ыйга киэҥ экраҥҥа көстүө. Корреспондент Николай Петров «Уһун Дьурантаайы» диэн республика саха тыллаах суруналыыстырын конкуруһугар «Бастыҥ анаарааччы» номинацияҕа III бириэмийэ лаурета буолбутун (2024 сыл от ыйын 1 күнэ), Дьиэ кэргэн сылыгар көлүөнэлэр алтыһыыларыгар анаммыт икки кинигэтэ («Дьоһун дьон удьуордара», «Аймах-уруу — улуу дьол») тахсыбытын санатабын.
Баай ис хоһоонноох үлэ-хамнас хас биирдии нэһилиэккэ ыытылларын хаһыат күннээҕи нүөмэрдэригэр булуохха, ааҕыахха сөп. Бэйэтин олоҕун, историятын ытыгылыыр киһи аймах хайа да түгэҥҥэ салгыҥҥа суураллан, сииккэ симэлийэн хаалбат. Биһиги ол туһугар үлэлиибит-хамныыбыт, кэлэбит-барабыт, суруйабыт-айабыт. Билиҥҥи кэмҥэ бэчээт ситимигэр үгүс уларыйыылар киирдилэр. Биһиги хаһыаппыт эмиэ уларыйар, олохтон хаалбат туһугар дьүккүһэр, интернет куйаарыгар, электроннай сайтка көстө.
Биир идэлээх суруналыыс доҕотторум! Бар дьон билиниитэ, дириҥ махтала санааҕытын кынаттаатын, үрдүктэн үрдүккэ көтүтэ туруохтун!
Күндү эрэллээх ааҕааччыларбыт! Эһиги үтүө сүбэҕит, ыкса сыһыаҥҥыт биһигини айарга-тутарга угуйар көҕүлүүр, өйөбүл-тирэх буолар. Эһиэхэ Бэчээт күнүнэн истиҥ эҕэрдэбин тириэрдэбин, дьоллоох, чэгиэн-чэбдик буолун!
«Хотугу кыым» хаһыат редакциятын кылаабынай редактора
Александра ЗАРОВНЯЕВА.