Ыйытыы: Муҥурдаах нэһилиэгиттэн Вера Андросоваҕа, Елизавета Малышеваҕа, Николай Тимофеевка аналлаах уонна аймахтарынан анал киэһэлэри ыытарга эрдэттэн олохтоохтору кытта сүбэлэһэн үлэ бардаҕына дьон культурнай, патриотическай үлэҕэ көмөтө, көҕө үрдүөҕэ диэн этиигэ нэһилиэк дьаһалтата, кулууба туох диэн эппиэттиэҕэй?
Екатерина Новикова, Муҥурдаахтан төрүттээх, Дьокуускай олохтооҕо.
Хоруйдуур Мария Подорожная, А.А. Дохунаева аатынан төрүт култуура киинин дириэктэрэ:
- Нэһилиэк кулуубугар аҥардас ырыаны-тойугу эрэ батыспакка, дириҥ ис хоһоонноох сырдатар үлэ сылын аайы ыытыллар. Ол курдук, биир дойдулаахтарбыт сырдык ааттарын үйэтитиигэ, кинилэр олохторун, айар үлэлэрин ахтан-санаан, араас тэрээһиннэри ыытабыт. Холобур, А.А.Дохунаева аата кулуупка иҥэриллибитэ, кини кэриэһигэр «Тыыннаах тыл» уус-уран туруоруу күрэһэ, Степан Новиковка өйдөбүнньүк турбута, «Ырыа — олох аргыһа» улуустааҕы күрэс иккитэ ыытылынна, дискэтэ, брошюрата таҕыстылар, Егор Стручковка өйдөбүнньүк стендэ, муннук оҥоһуллубута, норуот эмчиттэрэ Матрена, Александра Чирковалар бэлиэ сылларыгар дириҥ ис хоһоонноох, истиҥ ахтыы киэһэлэрэ ыытылыннылар, Василий Стручков-Абый Бааскалыын истиҥ көрсүһүү, Михаил Слепцов, Илья Ефимов, Василий Тимофеев, Галина Стручкова, Екатерина Дохунаева, Александра, Гаврил Ребровтар тустарынан уонна «Сыаҥааннаах сэрии ыар кэмнэригэр» кинигэлэр сүрэхтэниилэрэ, Олоҥхо киэһэтигэр Абый олоҥхоһуттарын сырдатыы, Айыы ойууна Көстөкүүн Чирков олоҥхотун бөлөҕүнэн толоруу уо.д.а. Тэрээһиннэр төгүрүк дааталарынан, бэлиэ күннэринэн тиһигин быспакка буолаллар. Онно олохтоох дьаһалтаны, түмэли, оскуоланы, библиотеканы, балыыһаны, аймахтары кытта кыттыһан, сүбэлэһэн ыытабыт.
Инникитин олохтоох дьаһалта, тэрилтэлэр, нэһилиэнньэ сүбэлэһэн, уопсай былаан оҥостон, биир сүбэнэн үлэлээтэхпитинэ, нэһилиэк духовнай сайдыытыгар, ыччаты патриотическай тыыҥҥа иитиигэ төһүү күүс буолара саарбаҕа суох.