Кини отонньут бастыҥа, балыкка, күстэххэ сылдьар, хортуоска олордон саамай эрдэ сиир, куурусса ииттэр, бильярдыырын сөбүлүүр, ырыаны таптыыр. Бу барыта Добун Никулин.
Оҕо эрдэҕиттэн ыарыһах киһи ычатыгар элбэх түбүк. Ол эрээри, кини кыраны ахсарбат киһи буолан, барытын “ааһан” иһэн оҥорор. Баҕар киниэхэ “Крутой” диэн таптал аата көмөлөһөрө буолуо. Бу ааты күтүөтэ Баһылай Сиидэрэп быычыкаа эрдэҕинэ иҥэрбитэ. Онтон ыла Сыаҥааннаахха дьон бары бу аатынан эрэ билинэр, билэр этэ.
Аны аҕыйах сыллааҕыта уолбут аатын уларытан турда. Урут Иван Слепцов буоллаҕына, билигин Добун Никулин. Бүгүн кинини кытта кэпсэтэбит.
— Ааккын уларыппытыҥ туохха көмөлөстө дии саныыгын?
— Урут наһаа элбэхтэ ыалдьан эрэйдэнэр буолан, манныкка тиийбитим. Санаабар дуу, сахалыы ааттаммытым кэннэ арыыйда буоллум. Дьон-сэргэ саҥа ааппын сонно билиммиттэрэ. Төрөөбүт ыйбар Добун диэн аат сөп түбэһэр этэ.
— Оскуолаҕа үөрэнэ сылдьан ханнык предмети ордорор этигиний, сөбүлүүр учууталыҥ?
— Ахсааны ордорор этим. Олох кыра эрдэхпиттэн тимир харчынан суоттуу үөрэммитим. Саамай сөбүлүүр учууталым Екатерина Алексеевна Дохунаева.
Добун кыра эрдэҕиттэн бэйэтин кыаҕынан үбү-харчыны үлэлээн булунара. Ол курдук, хас да сыл наадыйар дьоҥҥо сакааһынан хаар күрдьэр күрдьэх оҥорон, сиппиир баайан, дьоҕус сыанаҕа атыылаабыта. Үс сайын устата, ол саҕана ОДЬКХ маастара Н.В. Зыряновтыын, теплотрассаны көмүүгэ үлэлэспитэ, табаарыһыгар Иннокентий Томскайга окко киирсэрэ.
“Инникигэ хардыы” научнай-практическай конференцияҕа “Бизнес эйгэтигэр мин бастакы хардыыларым” дакылаатынан кыттан, бастакы степеннээх дипломунан наҕараадаламмыта. Бу барыта инники олоҕор туһалаах буолбута саарбахтаммат.
Билигин куурусса ииттэн, сымыыттарын атыылаан ыйга 26-28 тыһыынча солкуобайы киллэринэр. Көтөрдөрүн дьиэлэрин оттон, астарын буһаран, үчүгэйдик көрөр буолан, кыһыҥҥы кэмҥэ бары сымыыттыы тураллар.
— Оскуола кэнниттэн ханнык үөрэҕи бүтэрбиккиний?
— Оскуоланы 2012 сыл 9-с кылааһынан бүтэрэн, инбэлииттэр техникум-лицейдэригэр “Обувщик” идэтигэр үөрэммитим. Ол идэнэн сатаан үлэ булумматаҕым, сакаас да киирбэт этэ. Ол иһин, сыл буолан баран, иккистээн үөрэнэ барбытым. Бу сырыыга “Пекарь-мастер” диэн идэҕэ үөрэммитим. Ылаллара буоллар, билигин да барыам этэ. Күҥҥэ түөртэ босхо аһыыгын. Театрга, киинэҕэ, “Самородок” бассейҥҥа, кэнсиэрдэргэ илдьэ сылдьаллар. Олус үчүгэй этэ.
Добун бу лицейгэ үөрэммит кэмигэр ырыа, бильярд күрэҕэр кыттан миэстэлэһэн турар.
— Саамай сөбүлүүр дьарыгыҥ тугуй?
— Кулуупка баран бильярдыыбын, радио истэбин. Тыаҕа сылдьарбын сөбүлүүбүн.
Добун радионы истэр буолан, ыытааччылары барыларын аймахтарын курдук билэр. Сотору-сотору ырыа таайыытын күрэҕэр кыттар, Степан Новиков ырыатын сакаастыыр. Онон Степан ырыатын республика барыта истэр.
Бэйэтэ эмиэ ыллыырын сөбүлүүр. Нэһилиэккэ ыытыллар кэнсиэрдэргэ, күрэхтэргэ кыттан, бириистээх миэстэлэргэ тиксэр. Былырыын I өрөспүүбүлүкэтээҕи аһаҕас виртуальнай “Абыйым алгыстаах ырыалара” куонкуруска кыттыбыта. Быйыл Эргэ Саҥа дьылга Светлана Андросовалыын Аркадий Алексеев “Кыһыҥҥы ырыа” ырыатын дуэттаан, I миэстэҕэ тиксэн, микроволновканан наҕараадаламмыттара. Уонна ону элбэх оҕолоох аймахтарыгар Оля Сорокоумоваҕа бэлэхтээбиттэрэ.
Кинилэр дьиэнэн бары ырыаһыттар. Аҕалаах эһэтэ иккиэн икки харахтарынан көрбөт инбэлииттэр. Ону ол диэбэккэ, санаалара кытаанаҕынан, күүстээҕинэн салайтаран, сырдыкка талаһаллар. Аҕата Анатолий көрбөт буолуоҕуттан байааҥҥа оонньуур. Оттон эһэтэ, 90 саастаах Уйбаан, сарсыардатын ырыанан саҕалыыр.
Көрбөт киһини оҕолуур манан аҕай дьыала буолбатах. Оттон Добун дьонун иккиэннэрин бэркэ көрөн-истэн олорор. Таҥас-сап суунан, дьиэ-уот көрүнэн.
— Саамай сөбүлээн тугу астыыгын?
— Сахалыы баахыланы астыырбын да, сиирбин да ордоробун. Дьонум эмиэ сөбүлүүллэр.
— Дьиэҕэр-уоккар даҕаны, олоххор даҕаны көмөлөһөр дьоннордооххун дуо?
— Белай Гораттан убайдарым Ньургун, Олег наар кэпсэтэллэр. Абыйтан Анастасия Дохунаева. Ыаллыы олорор Левина Балбааралаах Рита, кыра эрдэхпиттэн билсэр дьоммут Лада Корякиналаах күн ахсын билсэллэр.
— Хаһыат нөҥүө кимиэхэ махталгын тиэрдиэххин баҕараҕын?
— Билигин эппит дьоммор уонна социальнай үлэһиппитигэр Маргарита Ивановна Реброваҕа. Маргарита уктаһы, үтүлүгү бараан таҥаһынан кытта тигэн аҕалар. Кини үлэтэ элбэх. Уонна кэмигэр элбэхтэ көмөлөспүт Рина Игнатьевна Винокуроваҕа махтанабын.
Кэпсэтииҥ иһин махтал! Доруобуйаны, тус олоххор дьолу баҕарабын
Анастасия СОРОКОУМОВА, Сыаҥааннаах.