Кэбэргэнэҕэ үөрүүлээх быһыыга-майгыга, Олохтоох көҕүлээһини өйүүр бырагыраамма нөҥүө үбүлэнэн тутуллубут элбэх функциялаах спортивнай площадка арылынна.
Спортивнай площадка арыллыытыгар биир дойдулаахпыт Петр Хабаров өҥөтө улахан. Кини СР спордун министерствотын ГТО конкурсугар кытта сылдьан, площадка тутулларын кэпсэтэн ситиспитэ. Бу комплекска оҕо, улахан дьон, инбэлииттэр эт-хаан өттүнэн сайдалларыгар олус туһалаах тренажердар турдулар. Петр Ивановиһы убаастаан санаан-ахтан туран, бу площадкаҕа кини аата иҥэрилиннэ. Онтон өйдөбүнньүк дуоска (баннер) сабыытын нэһилиэк аҕа баһылыга Атласов Иван Иванович, ветеран спортсмен Корякин Владимир Алексеевич, эдэр кэскиллээх спортсмен Айчилан Степанов арыйдылар уонна площадкаҕа киирэр кыһыл лиэнтэни быстылар.
Нэһилиэк аҕа баһылыга Иван Атласов Петр Иванович Хабаров туһунан истиҥ-иһирэх тылынан аҕынна уонна площадка тутуутугар кыттыбыт Слепцов Алексей Васильевичка, Слепцов Сергей Дмитриевичка, Аргунов Алексей Алексеевичка махтанна. Спорт, үөрэх бэтэрээнэ Корякин Владимир Алексеевич тыл этиитигэр, эдэр ыччакка, оҕолорго туһаайан, инникитин площадканы харыстаан, ыраастык тутан, тренажердарын алдьаппакка уһуннук тутталларыгар сүбэлээтэ.
Ол кэнниттэн Петр Иванович Хабаров өйөөн-убаан, көрдөрөн, Россия таһымыгар сөргүтэн таһаарбыт өбүгэлэрбит былыргы оонньууларын «Чыысхайы» (икки мээчик бырахсыыта) оонньоотулар. Бу оонньууну уруккуттан Кэбэргэнэҕэ наар оонньууллар эбит. Оонньуу быраабылатын, Сидор Сидоров быһаарбытын кэннэ, икки хамаанданнан оонньоотулар. Бу сөргүтүллүбүт оонньууну оҕолор, эдэр ыччаттар сэҥээрдилэр.
Ол кэнниттэн эр дьоҥҥо, дьахталларга волейбол күрэҕэ буолла.
Надежда Сидорова, общ.корр.