Анал байыаннай дьайыы инники кирбиитигэр саа-саадах тутаннар өстөөҕү кытары күөн көрсөр Абый нэһилиэгиттэн төрүттээх Эр Хоһууммутуттан биирдэстэрэ, Анатолий от ыйын 20-21 күннэригэр төрөөбүт-үөскээбит дойдутугар сынньана, күүс-уох ылына, дьонун-сэргэтин көрсө кэлэн барда.
Ыраах Украина сириттэн айаннаан кэлбит буойуммутун, бөһүөлэккэ киириигэ нэһилиэгин дьоно, саха омук сиэринэн, алаадьы, кымыс уунаммыт, хомус тыаһынан доҕуһуолланан, уруйдаан-айхаллаан утары көрүстүбүт. Анатолий төрүт дойдутун сирин аһатта, дьоннорун-аймахтарын, доҕотторун көрсөн үөрдэ.
Киэһэлик кулууп дьиэтигэр, этиллэрин курдук, ахтылҕаннаах “төрөөбүт” астарынан тардыллыбыт остуол тэрилиннэ уонна хоһуун буойуммут нэһилиэнньэни кытта көрсүһүүтэ буолла.
Көрсүһүү кэмин саҕана араас ыйытыктар киирдилэр. Анатолий олорго барытыгар сиһилии хоруйдаталаата. Төрөөбүт дойдуга таптал, бэриниилээх буолуу, дьону кытта истиҥ сыһыан суолтатын наһаа тиийимтиэтик быһааран эттэ. Оскуолаҕа үөрэнэр кэмигэр “Хоһуун” байыаннай-патриотическай кулууп элбэх туһаҕа үөрэппитин уонна уол оҕону үөрэтиигэ-такайыыга бу маннык хайысха сөптөөх буолар эбит диэн тоҕоһолоото. Уот сэрии инники кирбиитигэр күн аайы өлүүнү-сүтүүнү, эрэйи-сору кытта сирэй-сирэйгэ көрсөр буойун этэр этиилэрэ мустубут дьон өйдөрүгэр-санааларыгар тута иҥэн истэ.
Кэлбит дьон эмиэ санааларын үллэһиннилэр. Ол курдук, улаатан эрэр уол оҕолорго Эр киһи, көмүскээччи суолун тутуһарга туһалаах, сөптөөх сүбэ-ама тыллар этилиннилэр. Учууталларга, улахан дьоҥҥо эбэһээт ытыктабыл баар буолуохтаах дэнилиннэ.
Балтараа чаастаах көрсүһүү кэмэ биир мүнүүтэ курдук “элэс” гынан ааста. Түмүккэ, көрсүһүүгэ кэлбит хас биирдии киһи Анатолийга баҕа санаатын эттэ, кырдьаҕас дьоммут алҕаатылар, өйдөбүнньүк бэлэхтэр, харысхаллар туттарылыннылар.
Ыраах Украина сиригэр, уот сэрии инники кирбиитигэр дойдубутун көмүскүү сылдьар Эр Хоһуун уолаттарбыт кыайан-хотон, бука-бары дойдуларыгар, дьонноругар-сэргэлэригэр этэҥҥэ төннөн кэллэллэригэр баҕарабыт. Биһиги бары кинилэрдиин бииргэ!
Тимофей Томский, Абый нэһилиэгин аҕа баһылыга.