Ахсынньы 3 күнүгэр инбэлииттэр күннэрэ бэлиэтэнэр. Бу күн доруобуйаларыгар хааччахтаах дьон уопсастыба олоҕор кыттыһалларыгар көмөлөһөр, кинилэр бырааптарын көмүскүүр сыаллаах олохтоммута.
Екатерина Муромская 1946 сыллаахха Абый нэһилиэгэр төрөөбүтэ. Оттоох Атахха уһуйаан сэбиэдиссэйинэн үлэлээн баран, Магаданнааҕы медицинскэй училищены бүтэрбитэ. Үлэтин Чукоткаҕа роддомҥа акушерканан саҕалаабыта. Бу кэмнэртэн Екатерина Николаевна саҥа төрөөбүт оҕолорго, төрөөбүт дьахталларга хаан биэрэн быыһыыра. Диагноһыттан тутулуга суох, ыарахан туруктаах ыарыһахтарга элбэхтэ донордаабыта.
Екатерина Николаевна этэринэн, улахан киһи, бэйэтин доруобуйатыгар туох да охсуута суох, 350-450 мл хаанын биэриэн сөп. Хаанын куруук биэрэр киһи ыарыыны утары охсуһар кыаҕа улахан, тымныйан ыалдьыыга улаханнык бэриммэт, хаана саҥардыллар. Донордар хааннарын кимиэхэ биэрэллэрин билбэтэхтэрин да иһин, кылаабынайа, кинилэр дьоҥҥо көмөлөһөн, үтүө дьыаланы оҥорбуттарыттан улахан дуоһуйууну ылаллар.
Екатерина Магадантан көһөн кэлэн, Белай Гора балыыһатыгар, кырдьаҕастар дьиэлэригэр сиэстэрэнэн, массажиһынан үтүө суобастаахтык үлэлээбитэ. «Магадаҥҥа олорор эрдэхпинэ, бочуотаах донор диэн элбэх көмөнү оҥороллоро. Дьиэ-уот, кэлии-барыы төлөбүрэ барыта чэпчэтиилээҕэ, бородуукта, эмп ыларга көмө элбэҕэ. Манна хомойуох иһин, итинник чэпчэтиилэри көрбөппүн», — диэн иккис группалаах инбэлиит, Россия Бочуоттаах донора Екатерина Муромская хом санаатын этэр.
Анна ЧИРКОВА, Абый