Ааспыт нүөмэргэ этиллибитин курдук, депутаттар улуустааҕы сэбиэттэрин сессиятыгар 2024 сыллаахха сүөһү аһылыгын бэлэмнээһин туһунан боппуруоһу сырдатабыт.
Абый улууһугар 15 бааһынай уонна биирдиилээн дьон хаһаайыстыбалара баар. Итини сэргэ 98 бэйэ подсобнай хаһаайыстыбата, үс агрооскуола сүөһүнү иитиинэн дьарыктаналлар. Маны сэргэ улууспутугар 1060 таба, ол иһигэр 350 тыһы уонна 260 тугут баар.
Онон ыам ыйын 14 күнүнээҕи туругунан улууска ынах сүөһү ахсаана 511, ол иһигэр ыанар ынаҕа 206 буолан турар, торбос ахсаана 94. Улуус 1329 сылгылаах, итинтэн биэтэ 738 төбө. Этиллибит кэмҥэ 107 кулун төрөөбүт. Балары аһатарга үүммүт 2024 сыл сайыныгар 1968 тонна от бэлэмнэниэхтээх. Барыллааһын быһыытынан от үлэтигэр 85 звено, ол иһигэр 15 механизированнай, 32 механизацияламмыт аҥардаах, 9 илии-көлө уонна 29 илии биригээдэлэрэ үлэлиэхтээхтэр. Барыта 230 киһи от үлэтигэр тахсыаҕа.
Былаан быһыытынан Абый нэһилиэгэр 760 тонна, Дьооскуга 410 тонна, Майыар нэһилиэгэр 201 тонна, Муҥурдаахха 324 тонна, Уолбукка 273 тонна от бэлэмнэнэрин курдук торумнанна. Онон, уопсайынан подсобнайдары (834 тонна) ааҕан туран, улууска 1968 тонна от соҕотуопкаланарын улуус депутаттара сибидиэнньэҕэ ыллылар диэн улуустааҕы тыа аһаайыстыбатын салаатын салайааччыта Анисия Черемкина редакцияҕа ыыппыт информациятын таһаарабыт.
Николай ПЕТРОВ.