Ааспыт нэдиэлэҕэ тыа хаһаайыстыбатын салаатын специалиһа Николай Максимов Абый уонна Уус Дьааҥы улуустарын икки ардыгар сытар Муҥурдаах нэһилиэгин сиригэр «Нонгнондя» диэн ааттаах табаһыттар ыстаадаларыгар баран кэллэ.
Кинини кытта «Саха» НКИК корреспондена, «Үлэ дьоно» биэрии ааптара Екатернина Захарова уонна улуус баһылыга Владимир Новиков, ону сэргэ сирдьит Валерий Корякин уонна хас да илии-атах, көмө буолар уолаттар түөрт «Буранынан» сырыттылар. Дьиҥэ, Белай Гораттан Сыаҥааннаахха диэри массыынанан, онтон «Буранынан» 12 чаас устата 14 көстөөх айаны айаннаан ыстаадаҕа тиийбиттэр.
Манна Уус-Дьааҥыттан икки сыллааҕыта аҕалыллыбыт, саҥа төрүөҕү кытта 800 тахса таба баар. Төрүөх бара турар. Кинилэри көрөр-харайар, дойдуларыгар куоппатынар, Абый улууһун сиригэр-уотугар үөрэннинэр диэн Уус-Дьааҥы уолаттара маныыһыттыыллар эбит. Дуогабарынан. Билигин бу ыстаада Михаил Ефимов тэрийиитинэн «Абый» диэн тыа хаһаайыстыбатын производственнай тэрилтэтэ статустаах. Онон судаарыстыбаттан көмө ылар бырааптаах.
Уолаттар олорор сирдэрэ хайалар тэллэхтэригэр хотоолго баар, балаҕан туттан онно олороллор. Биригэдьиирдэрэ Дмитрий Ефимов кэпсээбитинэн кочевой ыал диэн аатыраллар эбит. Кини кэргэнэ, бэтэринээр үөрэхтээх Валентина Уус-Алдданнааҕы ветеринарнай управление Абыйдааҕы филиалын үлэһитэ. Ону кытта уруулара Христофор, Егор — табаһыттар. Уучааҕынан элбэх табаны кыайан салайан испэккин, ол иһин хас да «Буранннаахтар», олорунан эргийэллэр. Онуоха түөрт ыт баара, көмөлөһөллөр. Техникалара тимир оһохтоох үс балааккаҕа хараллар, бензинин, саппаас чааһын Усть-Куйгаттан аҕалаллар, астарын-үөллэрин эмиэ онтон. Хотоол сир буолан оттор мастаах, үрэхтээх буолан сайынын дьарҕаалыыллар үһү. Уолаттар үлэлиир усулуобуйалара бэртээхэй. Бары барыта баар, телевизор диэтэххэ телевизор, спутниковай сибээс, спутниктан интернет, баанньык, рациянан атын ыстаадалары кытта кэпсэтэ сыталлар. «Саҥа олох дьоно маннык хааччыйыыга олорон үлэлээбэт буолуохпут дуо. Силээннээххэ баран кэлэбит. Сайын маршруппутун уларытан көһөргө бэлэмнэнэбит», — дэһэллэр.
Мантан барбыт дьон хараал уонна таба туругун бэрэбиэркэлээтилэр, ахсаанын аахтылар. Урут куйукта, «атахтааһын» диэн ыарыы маассабай буолар этэ. Ол бу ыстаадаҕа биллибэтэх. «Хаар чараас буолан, табалар лабыктаны хаһалларыгар чэпчэки, онно эбии тууһу биэрэр буоламмыт, табаларбыт саҥа дойдуларыгар үөрэнэн эрэллэр. Бөрө кыыл баарынан баар да чугаһаппаппыт», — диир биригэдьиир.
Ити курдук, Николай Максимов үс хонуктаах командировкатыттан табалар туруктара үчүгэйин, уолаттар үлэлэрэ ситиһиилээҕин астына кэпсээтэ.
Николай Петров.