Тымныыбыт оҕуһун маҥнайгы муоһа тостуута халлааммыт арыый сымнаата, күммүт үөһэ ойдо, тула өттүбүт сырдыгынан сыдьаайда, дьон-сэргэ сүргэтэ көтөҕүллэн, сандал сааһы сэмээр кэтэспитинэн бардыбыт. Бу айылҕабыт биир ураты кэрэ-бэлиэ түгэнин Аан дойдутааҕы Десерт күнүнэн өссө ордук минньитэн биэриэх санаа киирэр.
Бу — киһи сүргэтин көтөҕөр өссө биир үөрүүлээх минньигэс бырааһынньык, Аан дойдутааҕы Десерт күнэ диэн ааттанан 17 сыл анараа өттүгэр баар буолбут эбит. Бастаан утаа бу бэлиэ күнү кейк-поп диэн (чупа-чупс курдук) иһигэр бисквиттээх, таһыгар сакалаатынан сууламмыт минньгэс аска анаабыттар, кэлин минньигэс ас арааһын барытын астаан, амсайан, бырааһынньык суолтатын кэҥэппиттэр.
Десерт күнэ. Чэйиҥ эрэ, бу минньигэс бырааһынньыкка тугу астыыбыт, дьиэлээхтэрбитин тугунан үөрдэбит диэн толкуйга түспүт буоллаххытына, Уолбут нэһилиэгин далбар хотуттарыттан сүбэтэ ылыҥ.
Хаартыскаҕа: Тамара Стручкова минньигэс десертэ — сакалааттаах фрукта
Омук тылын учуутала, айар-тутар талааннаах ийэ, Тамара Стручкова сүбэлиир:
— Мин кейк-поп бисквитин оннугар оҕолорго туһалаах фрукталары туттабын. Кыһыл, күөх винограды, мандарины, бананы, клубниканы туттуохха сөп. Бастаан фрукталары сууйталаан, бөдөҥнөрү кырбастаан баран үтэһэҕэ үөлэбит, онтон ууллубут сакалаакка уган ылабыт, үрдүгэр торду киэргэтэр бытархай кэмпиэттэри таммалатан киэргэтэбит. Оҥоһуллара түргэн, сииргэ минньигэс уонна туһалаах. Оҕолор олус сөбүлүүллэр, тэҥҥэ оҥорсоллор.
Оттон бу минньигэс күн торт сиэххитин саныыр буоллаххытына, алын кылаас учуутала Маргарита Жиркова сүбэтин тутуһуоххутун син. Кини түбүктээх үлэтиттэн иллэҥ кэмигэр торт астыыр. Кини торда олус минньигэс уонна асчыкка эрэ барытыгар табыллыбат гына, ураты үрдүк, уурбут-туппут курдук киэргэтиллибит буолар. Маргарита Михайловна бисквит уонна медовай тортары астыырын сөбүлүүр. Бисквит торду крем таһынан фруктанан киэргэтиэххэ сөп диир. Клубника, мандарин, киви, банан курдук чаҕылхай өҥнөөх фрукталар ордук киэргэтэллэр да, амтанын минньитэллэр даҕаны диир. Маны таһынан Жирковтар дьиэ кэргэн бырааһынньыктааҕы сандалыларыгар сахалыы төрүт минньигэс аспытын, сугуннаах сүөгэйи, морошкалаах суораты хайаан да уураллар, дьиэ кэргэнинэн бары сөбүлүүллэр эбит.
Өссө биир торду астыырын сөбүлүүр аптаах илиилээх далбар Соломонова Екатерина кэпсииринэн, бу бүлүүдэ кинилэр дьиэ кэргэҥҥэ саамай сөбүлүүр десертэрэ эбит. Хас төрөөбүт күн аайы хайаан даҕаны ыал ийэтэ бэйэтэ торт астыыр үгэстээх. Оҕолор ордук бисквит торду сөбүлүүллэр диир хаһаайка.
Екатерина бисквит тордун ырыссыаба уратыта суох, арай бисквити сииргэ ордук минньитэн, сымнатан, киэргэтиэх иннинэ, сиробунан сиигитэн биэриэххэ сөп диир.
Дьэ, онон, күндү ааҕааччы, бу минньигэс бырааһынньыгы ханнык десертинэн бэлиэтииргин толкуйдаа, биитэр дьиэ кэргэҥҥэ, тэрилтэҕит иһинэн коллективка Десерт күнүн уратытык тэрийэн сүргэҕитин көтөҕүҥ, олоххутун минньитиҥ.
Лариса СЛЕПЦОВА.