Абый улууһун тыатын хаһаайыстыбатын управлениета иһитиннэрбитинэн, быйыл от ыйын 25 күнүн туругунан от үлэтигэр дьон тахсыыта элбээбитэ бэлиэтэннэ. Санатар буоллахха, ходуһаҕа тахсыы от ыйын 20 күнүттэн саҕаламмыта. Былаан быһыытынан улуус үрдүнэн ынах сүөһү аһылыгар 1764 тонна от бэлэмнэниэхтээх.
Нэһилиэктэртэн киирбит дааннайдарынан оҥоһуллубут субуоккаҕа от ыйын 25 күнүгэр Абый улууһун үрдүнэн 778 тонна от бэлэмнэннэ. Онон сезоннааҕы былаан 44,1 бырыһыан туолан иһэр,
Нэһилиэктэринэн ылан көрөр буоллахха, балаһыанньа маннык. Абый нэһилиэгэр 398 гаа охсуллубут, ходуһаҕа 375 тонна от кэбиһилиннэ. Ол иһигэр Дьооску учаастагар 195 гаа сир охсулунна, 180 тонна от бэлэмнэннэ.
Муҥурдаах нэһилиэгэр, субуокка ситэритэ суох диэбит курдук, 118 гаалаах ходуһа охсуллан, 145 тонна от кэбиһилиннэ. Бу Муҥурдаах холугар аҕыйах сыыппара, онон бу күннэргэ тэтим күүһүрэн, көрдөрүү улаатарын кэтэһэбит.
Итинник балаһыанньа Майыар нэһилиэгэр, Уолбукка эмиэ баарын бэлиэтиэххэ баҕарыллар. Ол курдук кэбэргэнэлэр 54,5 гааны охсон, 69 тонна оттоохтор. Оттон Уолбукка 36 гаа эрэ охсулунна уонна 9 тонна от бэлэмнэннэ. Бу этиллибит хаһаайыстыбалар сүөһүлэрин ахсаана аҕыйах да буоллар, күнү-дьылы баттаһа былааны толоро охсоллоро бэрт буолуо эбит.
От хампаанньатыгар улуус үрдүнэн 231 киһи үлэлии сылдьар. Манна 86 звено, ол иһигэр 15 механизированнай, 32 механизированнай аҥардаах, 9 көлө-илии звенота уонна 29 илии звенолара оттууллар. Кинилэргэ барыта 54 тыраахтар окко үлэлиир.
(Абый улууһун тыатын хаһаайыстыбатын управлениетын субуоккатынан).
Николай Петров.