Кууһунан атыы биһиэхэ хайдаҕый?

Арктика эргииригэр сытар оройуоннарга эргиэн-транспортнай логистика быһыытынан хоту олорор дьоҥҥо күннээҕи туттуллар уонна сэдэх табаары, оҕуруот аһын, фруктаны, сымыыты, хортуоппуйу аҕалан атыылыыр буолбуттара республика кыһамньытыттан атыннык сыаналаныан табыллыбат.

Биллэн турар, улуус-улуус атын-атын усулуобуйалаах, сороххо харайар сирдэрэ тымныы буолан, оҕуруот аһа үлүйүүтэ баар суол. Оттон биһиэхэ  этэҥҥэ. Ол да буоллар, астыммат, сүөлүргүүр дьон бааллара биирдэ эмэ биллэн ааһар. Итини билээри блиц-ыйытыы оҥордубут.

Уолбуттан Вероника Горохова:

—   Нэһилиэккэ аҕалан атыылыыллара үчүгэй баҕайы. Ол гынан баран, ассортимена элбиирэ буоллар диэн баҕа санаалаахпыт. Хамнастаах дьоҥҥо сыаната сөп, сорох ыарырҕатар. Ас хаачыстыбатын ким да куһаҕан диэбэт.

Кэбэргэнэттэн Надежда Сидорова:

—   «Якутоптторг» аһа кэллэҕинэ сэргэхсийии. Дьон ас-үөл, оҕуруот аһын, хортуоппуй хаачыстыбата үчүгэйин этэллэр, сыаната да удамыр диэн хайгыыллар. Бу саҕалааһын сайдан иһэригэр баҕарабыт.

Белай Гораттан Мария К.:

—   Мин «зеленай рейс» кэллэр эрэ, фруктаны, сымыыты атыылаһа сүүрэбин. Ону таһынан хортуосканы, оҕуруот аһын ылан хаһааммытым, туустаммытым. Сыната сорох табаарга куораттааҕар чэпчэки. Ас барыта үчүгэй хаачыстыбалаах, буорту буолбут биир эмэ баар буоллаҕына, үлэһиттэр тута ыраастаан иһэллэрин элбэхтэ көрбүтүм.

Белай Гораттан Елизавета Кладкина:

Логистика киинэ аһыллан дьон биһирэбилин ылла. Сыаната удамыр, моркуоп, луук, сүбүөкүлэ, хортуоска куруутун баар. Урут коммерческай маҕаһыыҥҥа 2 чаас уочараттаан ылар буоллахпына, билигин олус үчүгэй. Макарон, куруппа, мас арыытын сыаналара икки төгүл чэпчэки. Үүт ас, сымыыт кэлэр да дьон, уруккуларын санаан дэлэйдик ыллахтарына, бүппэккэ ханна барыай.

Сыаҥааннаахтан Николай:

— Нэһилиэктэргэ кэлэр оптовай ас сыаната сөп эрээри, ас аҕыйах кэлэр. Сорох дьон матар, ааспыкка оҕуруот аһыттан маппытым. Аны сорох аһы атыылыыр буоллахтарына, үчүгэйдик сортировкалыахтарын наада, биир эмит алдьаммыт сымыыт баар буолар, ол суолга алдьанара буолуо. Биир эмэ репчатай луук сороҕор эргэ буолааччы. Ити аҕыйах грамм да буоллар, харчыга эбилик буолар. Кыра хамнастаах харчыта ханна да тиийбэт.

Абыйтан Анна Чиркова:

—   Биһиэхэ наһаа дэлэй, үчүгэй туруктаах ас кэллэ. Ити мин эрэ эпэппин, дьон барыта астынар».

Дьэ, дьон санаата итинник — иллээх, астыныы, дуоһуйуу тыллардаах хоруйдар кэллилэр. Үчүгэй дьыала үчүгэйдик салҕанан иһэрэ барыбытыгар табыгастааҕа уонна наадалааҕа биллэр буоллаҕа дии. Саҥа дьылга мандарины, апельсины, сибиэһэй помидоры, оҕурсууну оҕолорго күндүлүүртэн ордук туох баара буолуой…