Ханнык баҕарар омук инники кэскилэ ыччат, оттон норуоту хамсатар күүһэ уол оҕо. Уол оҕо үгэстэри тутуһар, сиэр-майгы өттүнэн уйан, сайаҕас, чиэһинэй, үтүө үлэһит буоларыгар, айылҕаҕа тапталы, киниэхэ сүгүрүйүүнү – ийэлээх аҕа иҥэрэллэр.
Ааспыт Россияҕа ийэ күнүгэр анаан уонна «Кыһын Саха сириттэн саҕаланар» фестиваль чэрчитинэн Ураһалаах нэһилиэгэр үтүө үгэскэ кубулуйбут «Зима начинается с Якутии» харыйаны сырдатыы уонна «Тоҥ балык» күрэҕэ буолан ааста. Күрэххэ Ураһалаах агрооскуолатын үрдүкү кылаас үөрэнээччилэрэ уонна кинилэргэ күн сирин көрдөрбүт, иэримэ дьиэни иччилиир хаҺаайкалар, күн күбэй ийэлэр кытыннылар.
Бастакы түһүмэх уол оҕо кыаҕын көрдөрөн, үрүҥ көмүһүнэн күлүмнүү оонньуур Индигир эбэбит саамай күндү бэлэҕин, хоту дойдуну ааттатар Чыыр балыгы хатырыктааһын буолла. Иккис түһүмэххэ уолаттар кыһарга холоннулар. Үһүс түһүмэх – «Өркөн өй».
Күрэххэ 6 хамаанда кытынна: Степанова Саргылаана Валерьевна – уола Толя, Горохова Екатерина Егоровна – уола Саян, Соломова Александра Дмитриевна – уола Дима, Стручкова Мария Ивановна — уола Миша, Садовникова Таьяна Иннокентьевна – уола Владислав уонна Садовникова Мария Егоровна – уола Мичил Ашырахманов.
Үс түһүмэх түмүгүнэн Кылаан бириис хаһаайыннарынан Соломова Александра Дмитриевна уонна кини уола Дима Слепцов буоллулар. Иккис урдэл – Степанова Саргылаана Валерьевна уонна кини уола Толя Степанов. Үһус үрдэл – Садовникова Мария Егоровна уонна кини уола Мичил Ашырахманов.
Хамаандалар бары бириис туттулар, ону тэҥэ Ураһалаах нэһилиэгин урбаанньыта Елена Афанасьевна Старостина хас биирдии кыттыбыт уолга 1000 солк. сертификаты туттарда. Уолаттар үөрүүлэрэ муҥура суох.
Күрэҕи Виктор Афанасьевич Шкулев, нэһилиэк бас-көс киһитэ, чөл олох пропагандиһа, спорду өрө тутааччы, Егор Дмитриевич Садовников, нэһилиэк биир киэн туттар каадырабай булчута, ыытыллар араас көрүҥнээх үлэ, тэрээһиннэр көхтөөх кыттыылаахтара, Татьяна Дмитриевна Стручкова, сынньалаҥ киин хаһаайыстыбыннай чааһын солбуллубат үлэһитэ, элбэх оҕо тапталлаах ийэтэ, 8 сиэн үтүө санаалаах элэккэй эбээтэ, Ия Ивановна Стручкова, ураты талааннаах, барытыгар дьоҕурдаах, ыллам ырыа, кэрэ үҥкүү аргыстаах, алаһа дьиэ ыалдьытымсах хаһаайката, дьүүллээтилэр.
Сынньалаҥ кэмигэр көрөөччүлэр Виктория Старостина, Карина Слепцова уонна Валерия Постникова биирдиилээн бастыыр иһин уомул балыгы хатырыктаан күрэхтэстилэр. Манна Валерия Гаврильевна кыайыылаах таҕыста.
Хатырыктаммыт, тиийдилэр да талбыт астарын астыылларыгар бэлэм уомулу киирии билиэт нүөмэринэн Степанов Александр Анатольевич сулбу тардан сүүйдэ.
Маннык интэриэһинэй, уол оҕоҕо инники олоҕор туһалаах тэрээһини төрөппүттэр, көрөөөччүлэр уонна уолаттар олус биһирээтилэр.
Уолттарбытыгар алгыс тылларын анаатахпыт буоллун:
Баҕарабыт Уолаттарбытыгар
Буор куккут буорайбатын,
Салгын куккут салыйбатын,
Сүр күүскүт түмүлүннүн,
Эр сэниэҕит эстибэтин,
Хара күүскүт хамматын,
Былчыҥ была быстыбатын.
Мария Садовникова, Ураһалаах сынньалаҥ киинин салайааччыта,
Галина Белоус, уус-уран салайааччы.