Балаҕан ыйын 15-18 күннэригэр «Илии сылааһа» иис сыаҕын тэрийиитинэн, Саха Өрөспүүбүлүкэтин Бырабыытылыстыбатын өйөбүлүнэн, анал байыаннай дьайыыга сылдьар биир дойдулаахтарбытыгар анаан «Эр хоһуун» таҥас кэмпилиэгин тигэр иистэнньэҥнэр куонкурустара ыытылынна.
Куонкурус аһыллыыта социальнай ситим нөҥүө ыытылынна. Куонкурус кыттыылаахтарын эҕэрдэлээн Саха Өрөспүүбүлүкэтин Бырабыыталыстыбатын бэрэссэдээтэлин бастакы солбуйааччы Дмитрий Садовников, куттал суох буолуутун хааччыйар судаарыстыбаннай кэмитиэт бэрэссэдээтэлэ Дмитрий Лепчиков уо.д.а. тыл эттилэр. «Илии сылааһа» иис сыаҕын салайааччы, «Гражданскай килбиэн» бэлиэ хаһаайката Ирина Саввина куонкурус туохха олоҕуран ыытылларын туһунан сырдатта, балаһыанньаны билиһиннэрдэ, ситиһиилэри баҕарда. Биһиги улууспутуттан уопсастыбаннай ыстаап салайааччыта Айталина Унарова куонкурус улахан үлэттэн тэриллэрин этэн туран эҕэрдэлээтэ, кыайыыга дьулууру, тулууру баҕарда.
Куонкуруска Таатта, Чурапчы, Томпо, Амма, Мэҥэ Хаҥалас, Хаҥалас, Нам, Кэбээйи, Өлөөн, Абый улуустарын, Жатай бөһүөлэгин хамаандалара түөрт күн устата барыта 13 устуука, 10 көрүҥ таҥаһы тиктилэр. Балаҕан ыйын 18 күнүгэр, киэһэ 18 чааска, куонкурус түмүктэннэ. Үлэ хаачыстыбатынан балаҕан ыйын 23 күнүгэр кыайыылаахтар быһаарыллыахтара.
Биһиги улууспутуттан иистээнньэҥэр Дария Антонова, Айталина Тарабукина, Вера Стручкова, Екатерина Горохова, Вера Слепцова, Клара Черемкина уонна Александра Заровняева кыттыыны ыллылар.
Ийэлэр илиилэрин сылааһынан угуттанан, алгыс тылынан арыалланан тигиллибит таҥастар, уолаттарбытыгар харысхал, дурда-хахха буоллуннар!