Хомус лотереятын оонньотор

Абый нэһилиэгин култууратын киинин уус-уран салайааччыта, хомус пропагандиһа Надежда Черемкина Хомус күнүгэр оҕолорго босхо лотерея ыытар. Былырыын Роман Готовцев 3 хомуһун оонньоппут. Быйыл Александр Рудых хомуһун Вероника Дохунаева сүүйбүт. Ону кытта Хомус күнүгэр анаан оҥоһуллубут тордунан оҕолорун күндүлүүр үгэстээх.  

Надежда Афанаьевна 2016 с. оҕолорго  «Айылҕан» хомусчуттар ансаамбылларын тэрийбитэ. Оҕолор сөбүлээн дьарыктаналлар. Ансаамбыл ситиһиитэ элбэх.

«6-с кылааска үөрэнэ сырыттахпына кулуупка үлэлии кэлбит Туйаара Егорова ансаамбыл тэрийбитэ. Дьарыктанан ыһыахха оонньообуппут. Ол саҕана маҕаһыыҥҥа хомус атыыланара.  Ол гынан баран түргэнник тыла босхо баран оонньоон бүппүтүм, интэриэс сүппүтэ.

Кэлин 2016 с. Уолбукка импровизатор-хомусчут Аркадий Егоров үлэлии кэлбит үһү диэн истэн, биһиги библиотекарь Александра Слепцованы уонна үлэ ветеранын, култуура туйгунун Светлана Афанасьевна Слепцованы кытта бастакы хомус күнүн 2016 с. оҕолору түмэн бэлиэтээбиппит. АркадийАлексеевиһы ыҥыран маастар-кылаас ыыттарбыппыт. Онтон ыла биир да сыл көтүппэккэ Хомус күнүн бэлиэтиибит. 2018 с. хомус туһунан ырыа, үҥкүү уонна оҕолор хомустаан улахан концерт туруорбуппут. Мин бэйэм хомусчут буолбатахпын. Оҕолор  интэриэстэрин тардаары бастаан видеонан үөрэппитим. Оҕолорбун кытта тэҥҥэ бэйэм үөрэнэбин. Мин кинилэри ритмы истэргэ, биир тэҥҥэ, туттан-хаптан оонньуурга дьарыктыыбын», — диэн Надежда Афанасьевна кэпсиир.

Билигин Хомус күнүн көрсө «Ыллаа-туой, хомуһум!» республикатааҕы хомус туһунан хоһооннорго уонна ырыаларга аһаҕас куонкуруска кыттаары бэлэмнэнэ сылдьаллар. Надежда бэйэтэ айбыт «Хомус алыба» хоһоонун ансаамбыл доҕуһуолунан ааҕар.

Өссө биир үөрүүлээх сонуннара — бу күннэргэ ансаамбыл Москваҕа тохсунньу 4-8 күннэргэр ыытыллар «Рождественские звезды-2024» фестиваль-конкурска ыҥырыы туппут.

Надежда Афанасьевнаҕа уонна кини оҕолоругар ситиһиилэри баҕарабыт. Өссө да үүнэ-сайда туруҥ!

Сусанна Никитина.