Сутуруохаҕа үгүс киһи кутун туппут, дууһатын долгуппут хайыһар спорда биир саамай сайдыбыт көрүҥэ буолар. Мантан биллэр хайыһардьыттар тахсыбыттара бэлиэтэнэр.
Бу күннэргэ оҕолорго үгэскэ кубулуйбут Слепцовтар династияларын бирииһигэр Ураһалаах оскуолатын үөрэнээччилэригэр күрэх ыытылынна. Күрэхтэһиигэ сүүрбэччэ хайыһардьыт сүүрдэ.
Маҥнайгы этапка 1-4 кылаас оҕолоро 500 м сүүрдүлэр. Барахсаттар ким хайдах сатыырынан бастакы күрэххэ стартаатылар. Манна охтооччу, кыайыыга дьулуһааччы да барыта баар. Ол эрэн күрэхтэһии аата күрэхтэһии. Кыайыылааҕы бириэмэтигэр быһаарар түгэҥҥэ кыргыттарга Айнаара Слепцова бастаата, иккис миэстэҕэ Саяна Горохова, үһүскэ Настя Слепцова таҕыстылар. Уолаттарга I миэстэни Айтал Слепцова, II миэстэни Владик Борзов, III миэстэни Айхал Борзов ыллылар.
Орто улахан кылаас кыргыттарыгар биирдии эрэ кыттааччы күрэхтэстэ. Уолбут оскуолатын 7 кылааһын үөрэнээччитэ Сардаана Слепцова 2 км үчүгэй көрдөрүүнү ситистэ. 3 км Саша Дохунаева сүүрдэ.
5 км, 14 мүн. 35 сөк кэлэн, Дима Слепцов эрэллээхтик бастаата. Иккиһи Миша Стручков, үсүһү Максим Сорокоумов ыллылар.
Салгыы эстафета хатыһыылаахтык, хардарыта куотуһуулаахтык ааста. Ангелина Максимова, Айтал Слепцов, Сандаара Слепцова, Кирилл Садовников, Максим Сорокоумов састааптаах хамаанда биэтэккэ бастакынан кэллилэр. Айнаара слепцова, Айхал Борзов, Саяна Горохова, Ариан Бурцев, Дима Слепцов иккис, Настя Слепцова, Владик Борзов, Саша Дохунаева, Владик Садовников, Смша Стручков үһүс бириистээх миэстэлэннилэр.
Кыайыылаахтарга грамоталары, анал суруктаах мэтээллэри, харчынан бириэмийэлэри туттардылар. Эһиил баччаҕа Хочоҕор биэргэр көрсөргө эттилэр.
Хайыһар спордун көҕүлээччи Мария Бережнова: «Улууска хайыһар спорда сүттэ, симэлийдэ. Маныаха сүрүн болҕомтону ууруохха наада. Спорт саала бу көрүҥҥэ наадата суох. 2013 сылтан биһиги дьиэ кэргэн тэрийэн ыытар күрэхтэһиибитигэр алын сүһүөх кылаас оҕолоро кыттыыны ылаллар. Оҕо таһырдьа сылдьан, сибиэһэй салгыны эҕирийэн сүүрэрэ-көтөрө доруобуйаҕа туохтааҕар да туһалаах. Онон кэнчээри ыччаттарбытын кыра саастарыттан хайыһарга дьарыктаан, спорду таптыы үөрэттэххэ, инникитин бу көрүҥ сайдар кыахтаах», — диэн бэлиэтээтэ.
Александра ЗАРОВНЯЕВА.